Чил кирида кьунин шартIарикай чаз МФЦ-дин пешекарри ихтилатна. Малум хьайивал, чил кирида кьаз кIанзавай касди эвелни-эвел вичив кьадай участок жа­гъурун герек я. И карда кадастрдин карта, чкадин администрацийрин сайтар (анра кирида вугун патал участокар раижун мумкин я) ишлемишда.

Чилин участокрикай савдайрин ва аукционрин порталдайни (мисал яз, «Торги России» сайт) малуматар жагъуриз жеда. Бязи дуьшуьшра чил кирида савдаяр галачиз вугунни мумкин я, мисал яз, дяведин махсус серенжемдин иштиракчийрив ва я махсус программайрин сергьят­ра аваз.

Чил кирида кьазвайда ам ишлемишунин макьсад тайинарун герек я: хуьруьн майишат патал; коммерциядин эцигунар патал; яшайишдизни медениятдиз талукь объект ва я бизнес патал. И макьсад­ри­лай кирида кьунин ва кирида кьазвай муд­дат аслу жезва.

Киричиди участок авай чкадиз, анин инфраструктурадиз фикир гун, ам ахтармишун важиблу я. Месела, улакьривай физ жедай чка хьуниз, эквералди, целди, газдалди таъминвилиз фикир гун меслят къалурзава.

Юридический рекьяй чилел къадагъа­яр, участокдал ишлемишунин жигьетдай сергьятвилер алани-алачни чира. И мес­элани кадастрдин ачух картадай ва Росреестрдиз арза ракъуруналди гьялиз ­жезва.

Чил ишлемишунин ва эцигунар авунин къайдайрихъ галаз таниш хьухь: эгер участок савдаяр патал малумарнаватIа, аукционда иштиракун патал арза вугун лазим я. Акси дуьшуьшда чкадин администрациядиз ва я и кIвалахар кьилиз акъуддай ихтиярар авай органдиз чил кирида кьаз кIанзавайдан гьакъиндай арза вугуз жеда.

Важиблу кар ам я хьи, киричиди учас­ток тайинарнавай вахтунда тайинарнавай макьсад патал ишлемишун чарасуз я. 2025-йисан 1-мартдилай Дагъустанда пуд йисан вахтунда участок ишлемишиз чир хьун (чил къайдадиз гъун, михьун, дуьзарун, ишлемишун патал гьазурвал акун) истемишзавай къанун кардик акатнава.

Участок кирида кьаз кIанзавайбурувай МФЦ-диз физ жеда. Икьрар кутIунун патал ихьтин документар герек я.

— паспорт;

— участок кирида вугун патал малумарнавайди тестикьарзавай къарар (администрациядай);

— сергьятар тайинарунай ва икьрар регистрация авунай ганвай гьакъидин квитанция.

«Лезги газет»