Вагонрин деподин (ВЧД-12) зегьметдин ветеран Девришбег Шихмегьамедович Мегьамедова ракьун рекьиз вичин уьмуьрдин саки 40 йис ганва. Ам 1935-йисан 17-майдиз Ахцегь райондин Ялахърин хуьре дидедиз хьана. Ада Дербентдин 1-нумрадин ракьун рекьин училище куьтягьна. Дяведин йисарин аял тир ада а чIаван заланвилерни магьрумвилер эхна, яни адан аялвал гзаф залан йисарал ацалтна. Эхь, а вахт гзаф четинди тир. Жаван тарсарилай кьулухъ чIехибурухъ галаз колхозда кIвалахуниз мажбур жезвай.

Хайи хуьре ирид йисан мектеб   акьал­­­­тIарайдалай кьулухъ Девришбег­ 1952­-йи­суз ракьун рекьерин училищедик экечI­на. Вагонар ремонтдай слесардин­ пеше къачуналди, инаг 1954-йисуз агалкьунралди куьтягьна. КIелунар бегьемарайдалай кьулухъ ада, Дербент станция­дин вагонрин деподин слесарь яз, зегьметдин рехъ башламишзава. Са шу­муд йисалай Д. Мегьамедов вагонриз­ килиг­завайдан, ахпа осмотрщик-автомат­чик­ви­лин пешедал элячIна.

ЧIехи несилдин ракьун рекьин къуллугъчийрин рикIел алатай асирдин­ 80-йи­сар хъсандиз алама. А йисара­ ­Дев­ришбег Мегьамедова Дербент­ стан­циядин кьиблепатан паркуна кIва­лах­завай. Сме­нада кьиблепатаз саки 30 поезд рекье твазвай. Ам гьамиша, акъва­зунар авачиз, поездар ахтармишиз агакь­дай. Ада Азербайжандин ракьун ре­кьин Дивичи станциядал кьван поезд­рин гьерекатдин хатасузвал заминламишзавай справкаяр гузвай.

Ракьун рекьин отделенидин ва виниз тир къуллугърин патай гзаф кьадар шабагьар ва грамотаяр авай ветеран 1992-йисуз ял ягъиз экъечIна. Девришбег Мегьамедов «Зегьметдин ветеран» медалдиз лайихлу хьанва. Вижевай хизандин кьил ва мергьяматлу инсан Девришбег Шихмегьамедовича пуд веледдиз тербия гана. Адахъ муьжуьд хтул, гьакIни кьве птул ава. Агъсакъал ва ­уьмуьр акунвай кас яз, адаз вичин хуьруьнэгьлияр тир ялахъвийрин, къуншийрин, дустарин, мукьва-кьилийрин ва багърийрин арада гьамиша лайихлу гьуьрмет ава.

ЧIехи Гьалибвилин юбилейдин йисуз Девришбег Шихмегьамедовичаз и чIехи сувар рикIин сидкьидай мубаракиз кIанзава. Адан буба Мегьамедов Шихмегьамед Мегьамедовичани фашизмдин винел гъалибвал къачуник вичин пай кутуна. Хейлин ялахъвияр хьиз, амни душмандихь галаз женг чIугун патал фронтдиз рекье гьатна.

Гьуьрметлу ветеран, играми Девришбег Шихмегьамедович! Ялахърин хуьруьн кьили агьалийри, куь багърийри, мукьва-кьилийри ва и цIарарин авторди квез 90 йисан юбилей мубаракзава! Къуй квехъ мягькем сагъвал ва мадни гзаф йисарин уьмуьр хьурай!

Адиширин  ялахъви,

«Семафор» газетдин кьилин редактор  РФ-дин журналистрин союздин член