Чна виликамаз хабар гайивал, 28-мартдиз Санкт-Петербургда, Россияда ачухнавай пешекарвилин муай-тайдай цIийи лигадин сергьятра аваз, спортдин и жуьредай пешекаррин арада Европадин чемпион, эхиримжи 10 йисуз спортда зурба агалкьунар къазанмишнавай машгьур чи ватанэгьли Жабар Аскерова Мугьамед Эль-Марахъ галаз кьиле фейи бягьсина, 1-раунддин сифте кьиляй ам нокаутдиз ракъуруналди, гъалибвал къазанмишна. Гьа инал чи ватанэгьлиди спортдин рехъ акьалтIарнавайдини раижна…
«Ассалам алейкум. Гьа иналди «гьелелиг» за акьалтIарзава. 30 йисуз кьиле тухвай спортдин залан, амма рикIиз хушди тир рехъ. Заз пешекаррин арада — 167, гьевескаррин арада 150 бягьс кьиле тухун кьисмет хьана. За Аллагьдиз шукур гъизва ихьтин рехъ гунай. Ахпани, дугъриданни, зун и спортдиз гъайи зи бубадилай за разивалзава. Гьайиф хьи, къе ам чи арада амач. Зи сифтегьан тренерар тир Сергей Сайфудинович ва Зайналбег Абдуллабегович сагърай, абуру заз спортдин гзаф сирер чирна, абур зун патал халис тренерар-насигьатчияр я! Яргъал йисара заз куьмекар гайи зи дустар ва стхаяр сагърай. Зи гъалибвилерал рикIяй-рикIиз шадвал авур, магълубвилерай гьайиф чIугур ксаризни заз сагърай лугьуз кIанзава!» — ихьтин келимаяр лагьана чи ватанэгьлиди бягьсинилай кьулухъ.
Рагнеда Рамалданова
