Россиядин ЦИК-ди хабар гайивал, 12-январдиз политический партийри къалурнавай кандидатривай  документар  кьабулна куьтягьна.  18-декабрдилай 12-январдалди РФ-дин сеч­ки­дин центральный комиссиядиз Россиядин Федерациядин Президентвиле кандидатар яз къалурун патал 70 субъектдай, гьа гьисабдай яз политический 24 партиядилай ва чпи-чеб къалурзавай 46 агьалидилай хабарар атана.

Чилинай акъатнач

Чпи-чеб къалурнавай анжах 15 касди ЦИК-диз герек документар агакьарна. Дикъетлувилелди ахтармишунар кьиле тухвайдалай гуьгъуьниз, законди истемишзавай къайдада тамам доку­ментар агакьар тавурвиляй 12 кас (инсанриз яшайишдин кIва­лер эцигда лагьана, абурун пулар­ чу­нуьхай Татьяна Воловик, “Ис­лам”­­ журналдин кьилин редактор, Дагъустандин муфтийдин уьмуьрдин юлдаш  Айна Гьамзатова, карчи Владимир Кузнецов, шоумен, Россия­дин стриптиз-клубрин ассоциациядин президент Лаки Ли, журналист Олег Лу­рье, блогер Алексей Навальный,  бизнесмен Сергей Полонский, вичи вич “СССР-дин президент” яз гьисабзавай Тристан При­­сягин, “Мергьяматлувал ая” центрадин башчи Василий Пугачев, “Парнасдин” Оренбургдин от­­­­­деленидин кьил Сергей Столпак, Челябинск шегьердин агьа­ли­­­яр тир Виктор Черепин ва бизне­смен Андрей Яцун) чилинай акъат­нач, яни регистрация аву­нач­.

Себебрикай рахайтIа, ЦИК-дин секретарь Мая Гришинади къейд авурвал, кандидатар къалурнавай сечкичийрин дестейрин  кьадарар истемишзавайдалай тIимил тир. Сеч­ки­чийрин дестейрин членар регистрация авунвай са бязи про­то­колар нотариусри тестикьар­на­вачир. Чпи-чеб къалурзавай ксарин терефдарри кьиле тухвай собранийрикай вахтунда ЦИК-диз хабар агакьарнач ва са бязи кандидатрин чарарик истемишзавай вири документар квачиз хьана.

Чпи-чеб къалурай агьалийрикай ЦИК-ди РФ-дин Прези­дент­дин кандидатарвиле Кострома областдин думадин депутат Владимир Михайлов ва исятда Президентдин къуллугъдал алай Владимир Путин регистрация авунва. “Возрождение” гьерекатдин башчи  Александр Чухлебовни регистрация авунвай, амма ам, Финляндияда яшамиш жезвайди фикирда кьуна, регистрация авунин къарар Верховный судди къуватдай вегьена.

Партийрин мумкинвилер

Алай вахтунда ЦИК-ди политический партийрин уполномоченный 220-дав агакьна векилар регистрация авунва. ЦИК-ди политический партийри къалурнавай кандидатрин документар кьабулнава: Э.Агурбашан (“Альянс зеленых” политический партия), С.Бабуринан (“Российский общенародный союз” пп), Е.Гордонан (“Партия “Добрых дел” пп), П.Грудининан (КПРФ пп), В.Жириновскийдин (ЛДПР пп), С.Полищукан­ (“Партия социальных реформ — прибыль от природных ресурсов — народу” пп), К.Собчакан (“Гражданская инициатива” пп), М.Сурайкинан (“Коммунистическая партия Коммунисты России” пп), Б.Титован (“Партия роста” пп), Р.Худякован (“Честно”/Человек. Справедливость. Ответственность/” пп), Г.Явлинскийдин (“Яблоко” пп), Н.Лисицынадин (“Рот фронт” пп), М.Козлован (“Партия социальной защиты” пп).

И  партийрин векилрикай гьеле Владимир Жириновскийни Павел Грудинин регистрация авунва, гьикI лагьайтIа Россиядин парламентда авай партийрин векилриз къулар кIватI тийидай кьезивал ава. Парламентдик квачир партийрин векилри регистрация авун патал 100 агъзур къул кIватIун герек я. РФ-дин ЦИК-ди гайи делилралди,  къенин йикъалди 12 партиядин дестейри къулар кIватIзава. Борис Титован, Ксения Собчакан, Григорий Явлинскийдин, Максим Сурайкинан ва амайбурун терефдарри уьлкведин вири регионрай къулар кIватIзава.

Партийрин векилри герек документар ва къулар 31-январдин нянин сятдин ругудалди вахкун лазим я. Гьар са кандидатди кIватI­­­навай къуларикай анжах 60 агъзур къул ахтармишда. Кар ана ава хьи, гила ЦИК-да къулар гьакъикъибур яни, тушни ах­тармишдай компьютердин махсус программа кардик кутунва, эгер кIватIнавай къуларин 5 процент дуьзбур тахьайтIа, кандидат регистрация ийидач.

Идалай гъейри, регистрация авун патал кандидатри чпин кар-кIвалахдин, доходрин гьакъиндай гьахъ-гьисабни (финансрин отчет) вахкана кIанзава. Гьа са вахтунда къецепатан финансрин активар авачирдан гьакъиндай хабарни гун истемишзава.

Закондин бинедаллаз, къецепатан банкара счетар, активар хьун къадагъа алай кар туш, ам­ма кандидат жезвай касди абур регистрация ийидалди вилик ага­лун лазим я. Мисал яз, Компартиядин кандидат Павел Гру­дини­наз Австриядин банкда вад счет авай ва абур ЦИК-диз вугай документра къейднавай. Регистрация ийидалди вилик ада и счетар­ агална, тахьайтIа Грудинин регистрация ийизвайди тушир.

Регистрация авунва я тавун

Президентвиле чпин кандидатар къалурнавай партияр мад авай. Кандидат къалурзавай съездар законди истемишзавайвал тухун тавурвиляй “Женский диалог”, “Партия мало­го бизнеса России”, “Народ против коррупции” партийрин векиларни регистрация авунач. “Социал-демократическая пар­тия России” партиядин векил С.Рамазанова, “Российская социалистическая партия” партия­дин кандидат И.Гагитэди ва “Ком­­му­нистичес­кая партия социальной справедливости” пар­тиядин векил О.Булаева чпи сечкийра иш­тирак тийидайдакай малумарна.

Къейд авун лазим я хьи, реги­страция авунвай кандидатри ­уьлкведин шегьерра сечкийрилай виликан штабар ачухзава. ­В.Путинан кьилин штаб Моск­вада кардик кутунва. Адаз пуд кас­­ди­ регьбервал гузва. Сочидин ба­жарагълу жаванрин кIе­лунрин “Сириус” центрадин руково­ди­тель Елена Шмелевади, ­“КамАЗ”-дин генеральный директор Сергей Когогина ва онкологиядик азарлу аялар сагъарзавай медицинадин центрадин директор Александр Румянцева. Штабда кандидатдин сайтни ачух­нава, телефонарни ава. ЦIийи Арбат куьчеда кандидатдин общест­венный приемни кардик кутунва. Гьар садавай кан­дидатдихъ галаз рахаз, адаз суалар гуз жеда.

16-январдилай уьлкведин вири регионрин сечкидин комиссияр сечкичийрин сиягьар туь­кIуьрунив эгечIун лазим я.

СМИ-ри сечкийра иштиракун

Россиядин Президентдин сечкийриз вири дуьньядин уьлквейри итиж ийизва. Иллаки государствойрин регьберри, политологри, журналистри… Сечкидин центральный комиссияди ма­лу­марнавайвал, сечкияр ви­ри­ за­конрал амал авуна, гъа­латI­­риз, си­нихриз, тахсиркарвилериз рехъ тагана кьиле тухуда­. И кар тешкилун патал алай аямдин техникадикай менфят къачузва. Сечкийриз гьазур жез­­вай ва сечкийрилай виликан кампания кьиле физвай гьалдикай агьалияр ха­бардар авун патал инсанар гзаф жезвай чкайрикай (МФЦ-яр, банкар, почтарин отделенияр, ра­­кьун рекьерин вокзалар…) мен­фят къачуда. ЦИК-ди вахт-вахтунда абурув герек малуматар агакьарда ва махсус икьрарар кутIуннавай карханайри, идарайри а хабарар агьалийрив агакьарда.

СМИ-рин векилри Президентдин сечкийра иштиракуниз талукь яз ЦИК-ди махсус къарар акъуднава. Адал асаслу яз, аккредитация авунвай журналистриз сечкийрин юкъуз участокра, сечкидин комиссийра, сесер гьисабзавай чкайра, сечкийрин нетижаяр кьазвай комиссийрин заседанийра жедай, протоколрин копияр къачудай, шикилар ядай, видеосъемкаяр ийидай их­тияр ава. Анжах комиссиядин, сечкидин участокдин председатель, я адан заместитель ва я учас­ток­дин комиссиядин секретарь виликамаз хабардар авуналди.

Аккредитациядин шагьадатнамаяр сесер гузвай юкъуз, сечкияр тикрар хъийидайлани ишлемишиз жезва. И шагьадатнама къачун патал газетрин, телеканалрин регьберри 21-январдилай 7-мартдалди ЦИК-диз ва я региональный комиссиядиз чпин патай сечкийра иштиракдай ксарин гьакъиндай заявка гун лазим я. ЦИК-дай аккредитациядин шагьадатнама гайи журналистдивай уьлкведин гьи регионда хьайитIани сесер гузвай юкъуз сечкидин участокриз физ жеда. Республикадин комиссиядай документ ганвай касдиз анжах гьа регионда сечкийра иштиракдай мумкинвал жеда.

Аккредитация авун патал герек документрин гьакъиндай малуматар ЦИК-дин сайтда ава. Шагьадатнамадал рангуналди “Россиядин Президентдин сечкияр” гафар кхьенва.

Нариман Ибрагьимов