“Лезги газет”
“Лезги газет”! Гуьзгуь газет!
Чаз виридаз кIани газет!
Эдебият, тарих чириз
Алахънавай багъри газет!
“Лезги газет” шииратдин макан я,
Дидедин чIал цавун аршдиз хкаждай.
Халис дуствал, чи лезгийрин лишан тир,
Хуьн паталди, Шарвили хьиз акъваздай.
Жуван халкьдиз къуллугъ ийиз алахъдай,
“Лезги газет” чи бахтунин лувар я.
Артух ийиз чи тарихдин девлетар,
Гьар са кIвале гуьзлемишдай сувар я.
“Лезги газет”! Вун чи кIвалин абур я,
Къуват я вун, гъизвай кIвализ берекат.
Вал вил алаз акъвазиз чун гьазур я,
Хабарар кIанз, акатзава гьерекат.
Гьар са хуьруьз чукIурзавай шад хабар,
Сулейманан районда вун багьа я!
Мубаракрай юбилейдин виш йисар,
“Лезги газет” вирибуруз ала я!
Нисейхалум Шихнебиева,
Сулейман-Стальский райондин
Агъа-СтIал-Къазмайрин мектебдин муаллим
_______________________________________________
Мубаракрай юбилей!
Лезги халкьдин яржарикай сад я вун,
Ви мухбир я — гьа и кардал шад я зун.
Дестекар яз ви далудихъ гала чун,
Мубаракрай, “Лезги газет”, юбилей!
Ви тIвар кьурла, шад жезава гуьгьуьл зи,
Вун дуст хьана — шадди хьана уьмуьр зи.
На лугьуди, язва вун зи суьгьуьрчи,
Мубаракрай, “Лезги газет”, юбилей!
Вун мугьман яз гуьзетзава виринра,
Ви “дувулар” авазва лап деринра.
Вилик финин ериш мадни йигинра,
Мубаракрай, “Лезги газет”, юбилей!
Дагъустанда газет, журнал мад ава,
“Лезги газет” лагьайтIа, чахъ сад ава.
Кьуд пата ви тариф ийиз, ад ава.
Мубаракрай, “Лезги газет”, юбилей!
Лезгистан ваз мулкар патал гъвечIи я.
Ви дережа гьар са рекьяй чIехи я.
Вун авачир югъни, белки, мичIи я.
Мубаракрай, “Лезги газет”, юбилей!
Агъзур йисан агакьрай вун яшарив,
АцIурай вун якъут-гевгьер къашарив!
Ачух суфра, дуьзмишнавай ашарив,
Мубаракрай, “Лезги газет”, юбилей!
Виш йис ятIан, вун кIубан я, жаван я.
Вун хурув кьун гьар са касдиз дарман я,
Ваз алхишар кхьизвайди Хазран я!
Мубаракрай, “Лезги газет”, юбилей!
Хазран Кьасумов
__________________________________________________________
* * *
Дидед чIалал рахада вун,
ЦIийи-цIийи хабарар гваз.
Чи кIвалериз хкведа вун,
Масан газет, “Лезги газет”.
На рахадай чIал чирда чаз,
Сивера чи ширин мез тваз,
Вун кIелайла, рикI жеда шад,
Руьгьдин къуват, “Лезги газет”.
Хайи халкьдин дамах я вун,
Зегьметчийрин даях я вун,
Вун галачиз яшамиш жеч,
Чи рикI алай “Лезги газет”.
Шагьэмир Гьажиев
(«Лезги газетдин» 2020-йисан 5-нумрадай)
