1920-йисан августдин вацра Махачкъала шегьерда “Советрин Дагъустан” тIвар алаз, сифте яз лезги газет чапдай акъатнай. Гьа вахтунилай къенин йикъалди газетдин тIвар са шумудра дегиш хьана (“Дагестанская беднота”, “ЦIийи дуьнья”, “Социализмдин пайдах”, “Коммунист”). Малум тирвал, 1991-йисан августдилай ам “Лезги газет” тIвар алаз чапдай акъатзава.
Печатдин изданиди 100 йисан девирда республикада кьиле физвай вири вакъиайрикай лезги жемят хабардарна, и кIвалах давамарзава. ЦIийи хабаррилай гъейри, ана тарихдиз, медениятдиз, чIалаз талукь месэлайрайни макъалаяр гзаф чапзава. Алатнавай девирда адан чинра алимри, арифдарри, философри, шаирри… — Ярагъ Мегьамеда, Мирза Алиди, Алкьвадар Гьасан эфендиди, Гьажи Давуда, Мегьарам эфендиди, Ильяс Низамиди, Етим Эмина ва масабуру лезги халкьдин тарих, меденият, эдебият, чIал вилик финик гьихьтин еке пай кутунатIа, гьакIни чи кьегьал рухвайрикай, гьа гьисабдай яз революционеррикай — Къазимегьамед Агъасиевакай, Мукьтадир Айдинбеговакай, Советрин Союздин Игитрикай — Гьазрет Алиевакай, Валентин Эмировакай, Эсед Салигьовакай ва масабурукай чапнавай макъалаяр кIелдайбуру хушвилелди кьабулна. Лезги районри фронтдиз гайи куьмекрикай газетда кхьенвай макъалайрин сан-гьисаб авач. Советрин девирда адан чинра кIвенкIвечи дояркайрикай, чубанрикай, багъманчийрикай… гьар са нумрада макъалаяр жедай. Ида хуьруьн зегьметчияр ашкъиламишдай, абур мадни бегьерлудаказ кIвалахиз алахъдай…
“Лезги газет” алай вахтундани уьмуьрдихъ галаз кам-камуна аваз физва. Ада агьалийрив республикада ва адалай къецени кьиле физвай вакъиайрикай хабарар агакьарзава. Адаз гьахълудаказ Лезгистандин уьмуьрдин гуьзгуь лугьуз жеда. Лезги халкьдин важиблу месэлаяр газетда тIимил къарагъарзавани! Ина алай вахтунда кIвалахзавай журналистар газетдин редакцияда арадал атанвай хъсан адетриз вафалу я. Къе газетдин кьилин редакторвиле зегьмет чIугвазвай Россиядин писателрин ва журналистрин союзрин член, жегьил лезги хва М.Ибрагьимоваз, тежрибалу журналистриз — М.Жалиловаз, Ш.Шихмурадоваз, Д.Бейбалаеваз, Н.Ибрагьимоваз, Ж.Саидовадиз, Р.Рамалдановадиз, М.Агьмедоваз ва амайбурузни заз сагърай лугьуз кIанзава. За “Лезги газетдин” редакциядин коллективдихъ мадни еке агалкьунар хьун алхишзава. Умудлу я, багъри газетди 100 йисан юбилей, чна гьар сада газет кхьиналди лайихлу пайни кутуна, уьзягъвилелди къейдда. 2020-йис патал чи гьар са ватанэгьлиди ам кхьин рикIелай ракъурдач. Сагърай вири!
Агьмед Агьмедагъаев, хуьруьн майишатдин илимрин
кандидат, РД-дин хуьруьн майишатдин лайихлу работник
