8-Мартдиз

 

Гьуьрметлу дишегьли вахар,

Мубарак хьуй квез и сувар.

Куьн гьамиша икI шад хьурай,

Пашман югъ квез гьич такурай.

 

8-Мартдиз и азадвал

Квез Цеткинан подарок я.

Чи патайни квез и шадвал,

Мад сеферда мубарак я.

 

Уьмуьрда квез агалкьунар,

Чандин сагъвал кьисмет хьурай.

Гьич тахьурай пис рахунар,

Куь арада гьуьрмет хьурай.

 

Ширин хьуй куь рахадай мез,

Гьар са гаф са мержан хьурай.

Чин ачух хьуй, шад яз хъуьрез,

Къуй квез бахтлу девран хьурай.

 

КтIай, чIуру адетрикай

Хкатна, квез гьуьрмет хьурай.

И дуьньядин няметрикай

Квез виридаз кьисмет хьурай…

1987-йис, Советский хуьр

БАЯН:
Мегьерам Ризаеван шиир чав Советский хуьряй чи мухбир ва муаллим Ферид Вагьабова агакьарна. М.Ризаеван архивда гьелелиг санани чап тавунвай хейлин эсерар ама.

«Лезги газетдин» 2023-йисан 10-нумрадай

___________________________________________

Яран сувар

 

Яр хьана гьа, яр хьана,

Ажеб хъсан кар хьана.

Лезгистандин аялриз

Шад Яран сувар хьана.

 

Яр хьана гьа, яр хьана,

Ялавар — цIаяр хьана.

Таза хъчад афарар,

Суфрадал хинкIар хьана.

 

Яр хьана гьа, яр хьана,

Алахьай йикъар хьана.

Аквада квез гуьгъуьнлай

Гуьлуьшан гатфар хьана.

 

Яран сувар, Яран сувар,

Ягълу квачир Яран сувар.

Яран сувар, Яран сувар,

ЦIининбур я ялан сувар.

 

Яран сувар, Яран сувар,

Са гьал хьанай шазан сувар.

Яран сувар, Яран сувар,

ЗатI авачир тапан сувар.

 

Ийизва къе хиялар,

Къведайвал я аялар.

Квел ацIурда жибинар,

Амачирла ширинар.

Март, 1992-йис.

Шиир чапдиз гьазурайди Ферид  Вагьабов я.

«Лезги газетдин» 2023-йисан 11-нумрадай