Дарманрин набататар
Тарцел жедай и емишдик рикI мягькемардай ва гуьгьуьлар хъсанардай такьатар ква. Пешекарри къейдзавайвал, гьар сезондин емишрикай, майвайрикай талукь вахтунда менфят хкудун герек я. Мисал яз, октябрдиз ичер, чуьхверар, хутар, ципицIар, хурмаяр ва жумар ишлемишун теклифзава.
Жум къадим Грецияда уьмуьрдин къуват гузвай чешме, кIанивилин ва яргъи уьмуьрдин ярж яз гьисабзавай. И емишдик С витамин, В дестедин витаминар, гьакIни калий, кальций, фосфор, магний, натрий ва ракь ква. Жумуни тIуьрди иливаруниз куьмекзава, рикI куниз аксивалзава, рикIинни дамаррин къурулуш мягькемарзава. Вичик С витаминар гзаф квайвиляй жумуни иммунитет мягькемаруниз, садакай масадак акатдай вирусдин азаррин вилик пад кьуниз куьмекзава.
Нервийрин къурулушдиз хъсан патахъай таъсирдай такьатар квайвиляй жумунихъ къалабулухдин гьиссер алуддай къуват ава.
«Лезги газет»
