Хуьруьн майишатдин карханаяр, лежбервилинни фермервилин майишатар, арендаторар патал ципицlлухра къизгъин вахт давам жезва. И арада шофервилин пешеяр чарасуз герек я. Хуьрера гьасилзавай продукция лазим тир карханайриз агакьарун па­тал абурухъ иллаки игьтияж ава.

Белиж поселокда яшамиш жезвай тежриба авай шофер Агьмадов Даира ингье са шумуд йис я зулун сезонда хуьруьн ма­йи­шат­дин карханайрихъ галаз икьрар кутlуниз, анра гьасилзавай ци­пицlар, вичин хсуси “ГАЗ-52” ма­шиндал лафет эцигна, Дербентдин коньякар ва газ квай чехирар хкуддай заводрив агакьариз.

Алай вахтунда ада, Дербент­дин коньякар хкуддай заводдихъ галаз икьрар кутlунна, а карханадин Азадогъли хуьруьн мулкарал арендада кьунвай ципицl­лух­ра гьакъисагъвилелди зегьмет чlугвазва.

“Зав гвай машин цlийиди туш. Нянихъ, кlвалахдилай хтайла, машиндал гъил элкъуьрзава. Пака кlвалахал фейила, галай юлдашрин зегьметдиз кьецl тагун, ципицlрай ацlанвай машин гваз рекьин юкьвал аламукь тавун патал за жуван хиве авай жавабдарвал гьиссзава”, — лу­гьуз­ва Д.Агьмадова.

Адан гафарай малум хьайивал, йикъа ада гагь кьве рейс, гагь пуд рейс ийизва. Гьаваяр чlур­ хьайила, са рейс ийидай вах­­тарни жезва.

Даиран хъсан къилихриз, вичин кlвалахдив намуслувилелди эгечlуниз килигна, адан зегьметдилай чlехибур рази яз амукьзава. Чешнелудаказ кlва­лахзавайвиляй гьар сезонда адахъ галаз икьрар кутlунзава.

Къагьриман Ибрагьимов