Москвада

Уьлкведин меркезда «Лезги диктант – 2026» ФЛНКА-ди тешкилна. Серенжемда и тешкилатдин кьил Васиф Гьасанова, РФ-дин Президентдин къвалав гвай РД-дин гьамишалугъ векилханадин векил Руслан Нагъиева ва масабуру иштиракна.

КIватI хьанвайбурухъ элкъвена, В. Гьа­санова хайи чIал хуьниз­ талукь гьар са мярекатдихъ важиб­лувал авайди къейдна. Ада, Да­гъус­тандин маса­ чIалар хьиз, лезги чIални ЮНЕСКО-дин пешекарри зайиф гьалда авайбурун сиягьдик кутунвайди рикIел хкана. Гьа са вахтунда гьукуматди герек тир шартIар арадал гъанвайди, чна и месэлайра активвал къалурна кIан­завайди къейдна.

Р. Нагъиева РД-дин гьамишалугъ векилханадин патай диктантдин мярекатдин тешкилатчийриз чухсагъул малумарна ва милли чIал хуьнин, машгьурунин рекье ФЛНКА-дихъ галаз гележегдани санал кIвалахиз гьазур тирди ла­гьана.

Чи  мухбир

Санкт-Петербургда

«Лезги диктант – 2026» Санкт-Пе­тер­­бургда авай чи ватанэгьлийрини кьиле тухвана. Медениятдинни марифатдин «Да­гъус­тан» цент­рада кьиле фейи мярекатда­ гзаф ватанэгьлийри иштиракна. Абур «Ди­дедин чIал чи дамах я» лишандик кваз тешкилнавай лезги писателринни шаиррин­ ктабрин выставкадихъ галаз таниш хьана.

РикIел хкин, цIи диктантдин мярекат писатель Забит Ризванован 100 йисан юбилейдиз бахшна. Алатай йисара чна и серенжем Дагъустандин халкьдин писатель Къияс Межидован, «Лезги газетдин», шаир, композитор, жемиятдин деятель Седакъет Керимовадин, Дагъустандин халкьдин шаир СтIал Сулейманан юбилейриз бахшнай.   

Диктант кхьидалди вилик и цIарарин авторди кеферпатан меркезда авай РД-дин векилханадиз мярекат тешкилуниз куьмек гунай чухсагъул лагьана. Диктантдин текст тежрибалу муаллим Венера Дадашевади кIелна. КIуьд касди диктант «5» къиметдалди кхьена. Гуьгъуьн­лай кIватI хьанвайбуруз тарихдин илимрин кандидат, Санкт-Петербургдин госуниверситетдин гражданский авиациядин кафедрадин доцент Тамила Давыдовади Забит Ризванован уьмуьрдинни яратмишунрин рекьикай ихтилатна.

Мярекатдал иштиракчийри хайи чIа­лал шиирарни кIелна. 

Низамидин  Къаинбегов