Россиядин Федерациядин гьукуматдин «Развитие культуры» программадин «Искусство ва яратмишун вилик тухун» федеральный проектдин сергьятра аваз, Дербентда креативный индустрияйрин мектеб ачухна.

Ана Дагъустан Республикадин культурадин министрдин везифаяр вахтуналди тамамарзавай З. Бутаевади, шегьердин кьил Х. Пашабегова, РД-дин Халкьдин Соб­ранидин депутатар тир В. Фаталиева, Т. Рагьимова, жемиятдин векилри ва шегьердин агьалийри иштиракна.

Мярекат ачухунин гаф рахай Х. Пашабегова Дербентда яратмишдай жегьилар гзаф авайди, абуру гьар жуьредин хилера чирвилер къалурзавайди, гьа жигьетдай яз, алай аямдин рекъемрин рекьерайни агалкьунар къазанмишзавайди къейдна.

З. Бутаевади кIватI хьанвайбуруз мярекат мубаракна, яратмишзавай жегьи­лар патал, абурун яратмишзавай хилер вилик тухун патал мектеб ачу­хунихъ метлеблувал авайди къейдна.

Алай йисуз 60 аял кьабулзавай мектебда пуд студия кардик ква. Абур герек тир тадаракралди таъминарнава. Ина жаванриз пуд хиляй (фото ва видеопроизводство, звукорежиссура ва электронный музыка, рекъемрин технологияр) яратмишунрин ва рекъемрин рекье чирвилер къачудай шартIар яратмишнава.

Чирвилер гунин кьетIенвал тежрибадихъ майилвалзавайди жеда: жаванри чпин хсуси проектрал кIвалахда, ида абуруз, мектебда кIелзамаз, чпин пешекарвилин портфолио туькIуьрдай мумкинвал гуда.

Къагьриман  Ибрагьимов