Алай вахтунда Къазахстандин меркез Астанада дуьньядин 135 уьлкведай тир 900-дав агакьна спортсменрин иштираквал аваз грекринни римлуйрин жуьреда кьуршахар кьунай дуьньядин чемпионат давам жезва. Белоруссиядин хкянавай ко­мандадик кваз экъечIнавай чи ватанэгьли Шуай Мамедова алатай­ саласадиз, чемпионатдин кьвед лагьай юкъуз, 77 кг-дал къведалди заланвал авайбурун арада буьруьнждин медаль къазанмишна.

Ш. Мамедов 1996-йисуз Мурманск­да дидедиз хьана. Грекринни римлуйрин­ жуьреда кьуршахар кьунай Россиядин ва Белоруссиядин спортдин мастер тир ада жуьреба-жуьре акъажунра, турнирра гъалибвилер икьван чIавалдини къазанмишнава, амма дуьньядин кесерлу­ майданда чIехибурун арада ада вичин алакьунар къалурнавай сад лагьай сефер я. Кьилди къачуртIа, Ш. Мамедов 2018-йисуз Бразилияда студентрин арада кIвенкIвечивал патал кьиле фейи акъажунрин, 2019-йисуз Белоруссиядин чIе­хибурун чемпионатдин буьруьнждин медалрин, 2023-йисуз Белоруссиядин Кубокдин сагьиб я. Ада Гроднодин Янка Купаладин тIварунихъ галай госуниверситет акьалтIарнава.

Рагнеда  Рамалданова