Дагъустанда арадал атай тIебиатдин бедбахтвили зарар гайи районрай тир аялар Вирироссиядин аялрин центрайриз ракъурнава. РикIел хкин, Россиядин просвещенидин министр Сергей Кравцован къарардалди бедбахтвилин шартIара гьатай хизанрай тир аялри уьлкведин виридалайни хъсан центрайра ял яда ва сагъламвал хъсанарда.
10-апрелдиз Дагъустандин 80 школьникдикай ибарат сад лагьай десте «Артек» центрадиз рекье гьатна. А дестедик мукьвара селди хасаратвал гайи Хасавюрт райондин хизанрай тир аялар ква. Гуьгъуьнлай аниз маса муниципалитетрайни аялар рекье твада.
Аялар рекье тун патал республикадин кьиле авайбурун, РД-дин образованидин ва илимдин министерстводин векилар, пешекарар ва диде-бубаяр атанвай. РД-дин Халкьдин Собранидин образованидин ва илимдин рекьяй Комитетдин председатель Елена Павлюченкоди сиягьат тешкилунин дережа винизди тирди къейдна: «Чаз и пуд гьафте аялар патал жезмай кьван менфятлудаказ акъатна кIанзава. И сиягьат гьакъикъатдиз элкъуьрунай заз РФ-дин просвещенидин министерстводиз, республикадин Кьил Сергей Меликоваз ва РД-дин образованидинни илимдин министерстводиз рикIин сидкьидай чухсагъул лугьуз кIанзава».
Школьникрихъ галаз лагерда пешекар педагогри, насигьатчийри ва яшайишдинни психологиядин рекьяй куьмек гудай пешекарри кӀвалахда. Аялар лагерда 21 юкъуз жеда. Куьмекдин программадин сергьятра аваз, фикирда кьунвай серенжемрикай РД-дин образованидин ва илимдин министрдин сад лагьай заместитель Аида Далгатовади лагьана:
«Къе сифтегьан 80 аял «Артекдиз» фена. Санлай къачурла, РФ-дин просвещенидин министерстводи зиянар хьанвай районрай тир аялар патал уьлкведин кӀвенкӀвечи центрайра – «Артекда», «Орлёнокда» ва «Сменада» чкадин алава 170 квота чара авунва. Идалайни гъейри, стха республика тир Кеферпатан Осетияди чи школьникар сагъарун патал мад 100 чка гана».
Тестикьарнавай графикдин бинедаллаз аялри уьлкведин центрайра апрель ва май варцара ял яда.
Чи мухбир
