Дагъустан Республикадин Кьил Cергей Меликован регьбервилик кваз республикадин экономика дурумлувилелди вилик фин таъминарунин рекьяй Оперативный штабдин заседание кьиле фена. Анал къадагъайрин серенжемриз акси тир важиблу месэлаяр (хъуьтIуьз гьазур хьун, ЖКХ вилик тухун, етим аялар яшайишдин кIвалералди таъминарун) веревирдна. Гьялзавай месэлайрив эгечIдалди, региондин Кьили Дагъустандиз Россиядин вице-премьер Денис Мантуров атунин ва ам промышленностдин карханайрихъ галаз таниш хьунин гьахъ-гьисаб авуна.
“Cифте нубатда чна майишатдин ва гьакIни агьалийрин адетдин уьмуьрдиз таъсирзавай энергетикадинни коммунальный инфраструктурадиз талукь месэлайриз фикир гун лазим я”, — лагьана Сергей Меликова. Мисал яз ада алатай йис рикIел хкана. ХъуьтIуьн варцара Дагъустанда энергетикадин, чимивилин хилериз талукь агъзурдалай виниз татугай дуьшуьшар хьана, яни гьар юкъуз — 6 дуьшуьш. Сергей Меликова и жигьетдай талукь карханайриз, идарайриз бегьерлувилелди кIвалахуниз эвер гана.
Етим аялар яшайишдин кIвалералди таъминаруниз талукь яз ада гьукумдин органрин ва муниципалитетрин руководителрин фикир ихьтин кардал желбна. “Эхиримжи йисара чна етим аялар яшайишдин кIвалералди таъминарунин мураддалди ахъайзавай пулунин кьадар артухарун патал чалишмишвална. Гьа са вахтунда нубатда авай инсанрин кьадарни фад-фад виниз акъатна. Ахтармишунар авурла, малум хьайивал, етимриз ахъайзавай пулар менфятлувилелди ишлемишзавач. Прокуратурадин ахтармишунри къалурайвал, нубатдин сиягьра етимвилихъ галаз алакъа авачир инсанарни гьатзава”, — лагьана региондин Кьили.
РД-дин Гьукуматдин Председателдин заместитель Руслан Алиева лагьайвал, Дагъустанда кризисдиз акси вири серенжемар агьалияр кIвалахдай чкайра амукьун, кIеве авайбуруз, иллаки аялар галай хизанриз, пенсионерриз куьмек гун патал тухузва.
Электроэнергиядин ва газдин карханаяр хъуьтIуьз гьазур хьуникай, республикадин ЖКХ-да кьиле тухудай реформайрикай “Россети Северный Кавказ” ПАО-дин генеральный директордин сад лагьай заместитель Виктор Абаимова, “Газпром межрегионгаз Махачкала” ООО-дин генеральный директор Ленар Мансурова, РД-дин эцигунрин, архитектурадин ва ЖКХ-дин министр Артур Сулейманова ихтилатна.
«Лезги газет»
