Дагъустандин делегацияди и йикъара Санкт-Петербургда

кьиле физвай экономикадин международный форумда иштиракзава

14-июндиз Санкт-Петербургда эконо­ми­кадин международный форумдин­ кIвалах гатIунна. 17-июндалди­ давам жедай и важиблу мярекатди­ чи уьл­кве­дин экономикадинни яша­йишдин уьмуьрда кьетIен чка кьазва, гьикI ла­­­гьайтIа ана дуьньядин 100-лай виниз уьлквейрин векилри иштиракзава.

Лагьана кIанда, экономикадин форум Урусатдин регионар патални инвес­тицияр желб ийидай, жуьреба-жуь­ре кар­ханайрихъ галаз икьрарар кутIундай, цIийи амадагар жагъурдай майдандиз элкъвенва.

Дагъустандин цIи форумда кьвед  ­­ла­­гьай сеферда иштиракзава. Рес­пуб­ли­­кадин делегациядик РД-дин Гьуку­мат­дин Председатель Абдулмуслим Абдул­муслимов, сад лагьай вице-премьер Рус­лан Алиев, Халкьдин Соб­ранида РД-дин Кьилин Векил Нуьсрет Омаров, экономикадин ва мулкар вилик тухунин министр Гьажи Султанов, туризмдин ва НХП-дин министр Эмин Мерданов, карчияр, инвесторар ва масабур ква. Делегациядиз Дагъустандин Кьил Сергей Меликова регьбервал ­гузва.

Къейд ийин хьи, форумда Дагъларин уьлкведи хсуси стендни гьазурнава­. Иштиракчийриз стенддин куьмекдалди­ Дагъустандин инвестицийрин про­ект­рихъ, туризмдин, промышленностдин, яшайишдин маса хилерихъ галаз таниш жедай мумкинвал ава.

ГьакIни стенддал алай йисуз 100 йис тамам жезвай Дагъустандин халкьдин шаир Расул Гьамзатован уьмуьрдиз ва яратмишунриз талукьарнавай­ пIипIни кардик кутунва. Кьилди къачур­тIа, ана шаирдин ктабар, архивдай къачунвай шикилар, жуьреба-жуьре документар эцигнава.

Чи мухбир