Росгвардиядин Дагъустанда авай управленидин начальник, полковник Вадим Кузнецов Каспийскдин А. Аджиеван тIварунихъ галай 12-нумрадин гимназиядин ва И. Ханбалаеван тIварунихъ галай Республикадин образованидин центрадин (РЦО) профилдин классра кIелзавай аялрихъ галаз гуьруьшмиш хьана.

Фадлай адетдиз элкъвенвай и гуьруьшда РФ-дин Госдумадин депутат Хизри Абакарован куьмекчи Мегьамед Багьаудинова, «Скорпион-Каспий» ОМОН-дин командир, полициядин полковник Александр Гортыпанова ва маса офицерри иштиракна.

Вадим Кузнецова аялрихъ галаз чими гьалара суьгьбетарна­, абуруз хъсандиз кIелунин, сагълам уьмуьр кечирмишунин, чIе­хи­бурухъ яб акалунин ва халис ватанпересар яз чIехи хьунин насигьатар гана. Аялри чпихъ тероргандин подразделенийриз экскурсия авунин мурад авайдакай лагьана. В. Кузнецова абурун тIа­лабун кьилиз акъудун, ихьтин экскурсияр тешкилун хиве кьуна­.

Мугьманри аялриз махсус форма ва нашивкаяр пишкешна­. М. Багьаудинова абуруз 19-апрелдиз футболдай Махачкъала­дин «Динамодинни» Санкт-Петербургдин «Зенитдин» къугъуниз­ килигиз атун теклифна. Школьникри абуруз сагърай лагьана.

Мярекатдин сергьятра аваз мугьманри аялри тешкилнавай жуьреба-жуьре викторинайра иштиракна. РЦО-дин директор Анжела Байрамбеговади абур центрадихъ галаз танишарна — мугьманриз кьетIен гъвечIи музеяр, Женгинин баркаллувилин кIвалер, аялри ва муаллимри ял язавай чкаяр къалурна.

Образованидин идарайрин регьберри – Хайрула Мурзаева­ ва Анжела Байрамбеговади – мугьманриз акьалтзавай несилдин къайгъударвал авунай сагърай лагьана ва профилдин классра чирвилер къачузвай аялрикай къанун-къайда хуьдай къурулушрин баркаллу адетар лайихлудаказ давамардай векилар хьунихъ инанмишвал къалурна.

* * *

И йикъара Россиядин ФСИН-дин (Федеральная служба исполнения наказаний) Дагъустанда авай управленида СВО-дин ветеранар ва абурун хизанрин членар кIвалахдалди таъминаруниз талукьарнавай мекера-гуьруьш кьиле фена. Ам тешкилнавайбур УФСИН, «Защитники Отечества» фондунин региондин филиал ва республикадин агьалияр кIвалахдалди таъминардай центр (ЦЗН) тир.

Мярекатда УФСИН-дин начальникдин заместитель, къенепатан къуллугъдин полковник Рашид Зейнулабидова, кадрийрин отделдин начальник, къенепатан къуллугъдин подполковник Юсуп Муцаева, «Защитники Отечества» фондунин регьбердин заместителар Наира Гьажимегьамедовади ва Имам Жаватханова, СВО-дин иштиракчияр кIвалахдалди таъминарунин ва пешекарвал къачунин рекьяй сектордин координатор Диана Племяшовади ва ЦЗН-дин отделдин начальник Мавлудин Гьалимова иштиракна.

– Гъиле яракь аваз чи уьлкве хвейи ксар патал пакадин йи­къахъ инанмишвал хьун гьикьван важиблу ятIа, чун гъавурда ава. Чи везифа гьакI са кIвалах теклифуникай ваъ, абуруз уьмуьрда чпин чка жагъуриз куьмек гуникай ибарат я. СВО-дин иштиракчийрихъ виниз тир сабурлувал, низамлувал, жавабдарвал ава. Ихьтин ерийрин сагьибрихъ чи къурулушда еке игьтияж ава, — къейдна Рашид Зейнулабидова, мярекатдин нетижаяр кьадайла.

Мекерадиз атанвай ксар УИС-да (уголовно-исполнительная система) авай ачух вакансийрихъ галаз танишарна. УФСИН-дин векилри кандидатрин тIалабунрикай, яшайишдин рекьяй заминвилерикай ва кьезилвилерикай, Россиядин ФСИН-дин вузра кьилин образование къачунин мумкинвиликай суьгьбетна. ГьакIни СВО-дин ветеранриз ва абурун хизанриз гьихьтин куьмек аватIа, абуру пешекарвал хкажунин, агьалияр кIва­лахдалди таъминардай центрада учетда акъвазунин ва маса месэлайрин гъавурда туна. Нетижада са шумуд касдиз кIвалахдин патахъай суьгьбетдиз теклифна.

Рагнеда  Рамалданова