МичIивиле амукьда

РагъакIидай патан уьлквеяр В.Зеленскийдин акьалтI тийир истемишунри галатарнава ва абуру мад куьмек хгун тавун мумкин я. “Новости” РИА-ди раижзавайвал, ихьтин фикир Китайдин “Гуаньча” чешмеда кхьенва.

“Зеленский вини кIарарай рахаз ва еке истемишунар ийиз, “яцIу авунвай” тахсирар кутаз вердиш хьанва, вучиз лагьайтIа тереф хуьзвай уьлквейри адан ихтилатар са туьгьметарни тавуна кьабулзавай… Адакай РагъакIидай патан уьлквейрин неинки агьалияр, гьакI СМИ-ярни, гьукумдарарни икрагь хьанва”, — кхьенва чешмеда.

Адан фикирдалди, Киевди тамамдиз куьмекдик умуд кутунва, эгер РагъакIидай пата “экв хкадарайтIа”, Украина мичIивиле амукьда.

“Украинади ислягьвал арадал хкунин рахунрикай кьил къакъу­дун, чара уьлквейривай куьмекдин еринда еке пулар истемишун — ибур ахлакьдин жигьетдай ийизвай гьелягьдин гьерекатар я. Ихьтин рафтарвилер РагъакIидай патавай эхиз жедайбур туш”, — алава хъувунва чешмеда.

Къейд ийин, В.Зеленскийди Украина НАТО-диз ва ЕС-диз кьа­булун РагъакIидай патан уьлквейривай нубатдин сеферда тIалабнава. Идакай “ТАСС” чешмеди хабар гузва. Зеленскийдин фикирдалди, Украинади военный блок “хуьник бегьем пай кутунва” ва, и кар себеб яз, “уьлкве тамам ихтиярар авай ЕС-дин ва НАТО-дин член хьун лазим я”.

ЦIийи санкцияр

Евросоюзди Россиядиз акси яз кардик кутазвай цIийи санкцийрин сиягьдик кьилдин ксар гзаф кьадарда акатнава. Акси серенжемриз талукь делилар «Politico» чешмеди раижнава. Гьа са вахтунда чешмеди санкцийрик акатзавай ксарин тIварар ва тайин кьадар малумарнавач.

Чешмедин делилралди, Латвиядиз, Литвадиз, Польшадиз ва Эстониядиз цIийи санкцийрал рази хьунин ва Россиядин наф-тIадин вини кьилин къимет тайинарунин жигьетдай кIватIал­дин муькуь уьлквеярни чIалал гъиз кIанзава. Гьа са вахтунда Ев­ро­падин са жерге дипломатри и теклифдин тереф хвенач. Абурун гафаралди, цIийи санкцийрин сиягь гьелелиг гьазур туш ва наф­тIадин къиметдал сергьятар эцигуни гьалар мадни четинарда.

Токаев гъалиб хьана

Къазахстандин исятда авай президент К-Ж. Токаева вахтунилай вилик хьайи уьлкведин регьбер хкягъунин сечкийра гъалибвал къачуна. Идакай “Новости” РИА-ди ма­лумарнава. Уьлкведин ЦИК-ди кьунвай нетижайрал асаслу яз, Токаеваз 81,31 про­центдин сесер хьана.

Вахтунилай виликан сечкияр Къазахстанда 20-ноябрдиз кьиле фена. Къейдзавайвал, уьлкведа сечкийра иштиракайбурун кьадар 69,44 процентдикай ибарат я.

Ракетаяр агакьарна

Великобританияди Украинадиз “Brimstone-2” ракетаяр ракъур­нава. Идакай “Новости” РИА-ди хабар гузва.

Къейдзавайвал, и ракетаяр вини дережадин дуьм-дуьзвал авайбур ва, идалай вилик акъудай жуьрейрив гекъигайла, кьве се­ферда яргъал мензилдиз ахъайиз жедайбур я. Амма нубатдин сеферда Украинадиз ракъурнавай ракетайрин кьадар раижнавач.

Лондонди Украинадиз зур йис идалай вилик “Brimstone-1” ракетаярни ракъурнай.

ЦIайлапанди яна

Филиппинра цIайлапан себеб яз кьуд касдиз зарар хьана. Идакай “lnquirer” чешмеди хабар гана. Къейдзавайвал, хасаратвал хьайибур са хизандин векилар я. Фу нез ацукьнавай береда абурун кIвалихъ цIайлапан галукьна. ЦIайлапанди ягъайдалай кьулухъ абуру бедендин бязи чкайра тIал гьиссна. Нетижада азарханадиз аватна.

Гьеле фад я

Россиядин здравоохраненидин министерстводин пешекар В.Чуланова малумарнавайвал, коронавирусдихъ галаз алакъалу гьалар гьелелиг муракаббур яз ама. Ковиддин винел Россия­ди та­мамдиз гъалибвал къачунва лугьун гьеле фад я. Адан гафар “Новости” РИА-ди раижнава.

Малумарнавайвал, сагъардай чкайра коронавирусдик заландиз начагъ ксар ама. Садакай масадак акатдай азаррин вилик пад кьунин оперативный штабди 22-ноябрдиз малумарай делилралди, тIугъвал пайда хьайидалай инихъ вирус акатай ксарин кьадар чи уьлкведа 21 545 351-дав агакьнава, кьейибурун кьадар — 391568-дав.

«Лезги газет»