5-майдиз10-сеферда яз Сулейман-Стальский районда Ватандин Чlехи дяведин машгьур иштиракчи, генерал-майор Мегьамед-Гъанифа Шайдаев рикlел хкуниз талукьрнавай волейболдай гьар йисан районрин уртах турнир кьиле фена.

Адетдиз элкъвенвайвал, турнир дяведин иштиракчидин ватан тир Цмур хуьре кьиле фена.

Мярекатда райондин Кьил Нариман Абдулмуталибова, райондин депутатрин Собранидин председатель Штибег Мегьамедханова, отставкада авай генерал-лейтенант, РФ-дин налогрин къуллугъдин гьукуматдин советник, Гьажи-Къурбан Шайдаеван хва Рагьман Шайдаева, Ярославский областдин общественный палатадин член, Ярославлда авай ЛНКА-дин президент Васиф Гьасанов, райадминистрациядин кьилин заместителри, жавабдар къуллугъчийри ва масабуру иштиракна.

Метлеблувиликай ихтилат авуналди,  мярекат райондин Кьил Нариман Абдулмуталибова ачухна.

Турнирда Кьиблепатан Дагъустандин шегьеррин, районрин хкягъай дестейри иштиракна. Къугъунрин нетижада Цмур хуьруьн десте гъалиб хьана. Кьвед лагьай Сулейман-Стальский райондин дестеди, пуд лагьай чка Дербент райондин дестеди ва кьуд лагьай чка Мегьарамдхуьруьн райондин волейболистри кьуна.

Гъалиб хьайи ва хъсан чкаяр кьур дестеяр кубокралди, грамотайралди, талукь тир дережадин дипломралди ва Шайдаеврин хизандин патай пулдин пишкешралди къейдна.

«Лезги газет»