Халкьарин садвилин югъ вири уьлкведа шадвилелди, жуьреба-жуьре мярекатар тухуналди къейдна. Россиядин Президент Владимир Путина, адет хьанвайвал, Яру майдандал хкажнавай Кузьма Мининан ва Дмитрий Пожарскийдин памятникдал цуьквер­ эцигна. Ахпа ада майдандал кIватI хьанвай кьванбуруз сувар тебрикна. «Россиядин халкьар» международный гьафтедин иштиракчий­риз Халкьарин садвилин югъ мубарак авунихъ галаз сад хьиз  ада лагьана: «Чи уьлкве зурбади я. Чи уьлкведа гзаф халкьар яшамиш жезва. Абурун культурайрин, адетрин жуьреба-жуьревиле чи къуват, чIехи крарин мумкинвал ава. Уьмуьр санал акъвазнавач. ЦIийи-цIийи къурхуяр арадал къвезва. Абурун хура акъвазун патал чаз дикъетлувал герек я. Халкьарин ва агьалийрин арада къал тваз кIанзавай гьар са гьерекатдин вилик пад кьуна кIанда. Чна чи халкьарин арада садвал датIана хвена кIанда. Ам чи виридан девлет ва гележег я».

Дагъларин уьлкведа Халкьарин садвилин югъ виринра шад гьалара къейдна. 3-ноябрдиз меркезда Дуствилин кIвалин залда суварриз талукьарнавай еке концерт гана. Анал РД-дин Гьукуматдин Председатель Мегьамед Рамазанова Дагъустандин Кьил Федор Щукинан тIварунихъай кIватI хьанвайбуруз сувар мубаракна.

4-ноябрдиз Федор Щукина рес­публикадин экономика, яша­йиш, культура, спорт вилик тухуник­ аквадай хьтин пай кутазвай, зегьметда агалкьунар къазанмишзавай ксарив гьукуматдин шабагьар вахкана. Абурун арада военный къуллугъчияр, гуьгьуьллубур­, духтурар, муаллимар, культурадин, хуьруьн майишатдин зегьмет­чияр ва маса пешейрин иесияр авай.

Шабагьар вахкунихъ галаз са­нал Федор Щукина лагьана: «КIе­ве гьатай вахтунда Ватан хуьз вири халкь къарагъай дуьшуьшар чи тарихда гзаф ава. Къени Дагъларин уьлкведин аскерар, гуьгьуьл­лубур Россиядин вири халкьарихъ галаз санал Ватандин итижар хуьнин женгиник экечIнава. За къе абуруз рикIин сидкьидай сагърай лугьузва, абурув гьукуматдин шабагьар вахкузва».

Медицинадин къуллугъчийрин четин ва лап герек кIвалах къейд авуналди, региондин регьберди абурузни сагърай лагьана: «Чи агьалийрин уьмуьрдин ва сагъламвилин къаравулда акъвазнавай медицинадин къуллугъчиярни халисан игитар я».

Шабагьар агакьай муаллимрин, тербиячийрин, насигьатчийрин тIварцIихъни Федор Щукина­ хуш гафар эзберна: «Куь гьар йи­къан зегьметдилай, алакьунрилай­, куьне акьалтзавай несилдиз гузвай тербиядилай чи аялрин ва вири Дагъустандин гележег аслу я».

Республикадин меркезда сувариз талукьарнавай са шумуд мярекат кьиле фена. Экуьнин сятдин 8-даз Ленинан майдан инсанрив, иллаки велосипедар гвайбурув ацIанвай. Шегьердин админист­рациядин кьил Жамбулат Салаво­ва абуруз Халкьарин садвилин югъ мубаракна ва лагьана: «Россиядин халкьарин садвилин йисуз ихьтин велопробег кьиле тухун лишанлу кар я. Сагъламвал мягькемарзавай ихьтин серенжемдихъ­ жемиятдин арада меслятвал мягь­­­кемарунин кардани еке метлеб ава. ЧIехибурун арадай жегьилар, жаванар, гьатта аяларни акуни рикI шадарзава. Велопробег тешкилнавай вири сагърай!».

Рахунрилай гуьгъуьниз велосипедрал алай 1100 кас юзана. Абур Расул Гьамзатован проспектдай фена, I Петрдин проспектда рехъ давамарна, та МФЦ-дин дараматдив агакьдалди. Иштиракчийрин арада меркезвияр, маса шегьеррай, районрай, гьатта Россиядин регионрай атанвайбурни авай. КIвенкIвечи чкаяр кьур 21 касдиз велосипедар багъишна. Хейлинбуруз жуьреба-жуьре пишкешар гана. Велопробегда иштиракай виридан гуьгьуьлар шадбур, суваринбур тир.

Тарихдин «Россия – зи тарих» паркуна,  РФ-дин Ватан хуьзвай ас­керрин хизанрин комитетдин региондин отделение тешкилатчи­ яз, сувариз талукьарнавай «Са уьл­кве – са хизан» тIвар алаз еке мярекат кьиле фена. Ана шегьердин администрациядин кьил Жамбулат Салавова, РФ-дин Игит Нурмегьамедован диде, Госдумадин депутат Сапижат Мазаевади, РД-дин Халкьдин Собранидин депутат Елена Ельниковади, «Память гор» тешкилатдин председатель Махач Шамилова, жемиятдин организацийрин векилри, СВО-дин иштиракчийри ва абурун хизанри иштиракна.

Мярекат СВО-дин иштиракчий­рин аялри ачухна. Милли парта­лар алай абуру хайи чIаларал шиирар кIелна, милли адетрикай суьгьбетна ва кьуьлерна.

Жамбулат Салавова къейд авурвал, Ватан кIан хьун, жуьреба-жуьре халкьарин векилри сада-садаз гьуьрмет, куьмек авун, къецепатан къурхуйрин  аксина туп­ламишвал къалурун государстводин кар алай ва важиблу ерияр я. Ада мярекатда иштиракзавай дяведин махсус серенжемдин иштиракчийриз, абурун хизанриз сагърай лагьана ва шегьердин гьукумдин патай герек куьмек агакьдайди къейдна.

– Къе чахъ галаз сувар къейдзавай куь веледриз садрани дявеяр такурай, – лагьана муниципалитетдин регьберди­. – Абур чи республикадин ва уьлкведин гележег я. Шегьерда чи аялриз­ кIелдай, спортдал машгъул жедай, ял ядай ва кIва­лахдай хъсан шар­тIар ава.

Дагъустан Республикада Ватандин аскеррин хизанрин комитетдин (КСВО) региондин штабдин кьил Мегьрибан Муслимовади виридаз сувар тебрикна ва государстводи СВО-дин иштиракчийризни абурун хизанриз гузвай куьмекдикайни ихтилатна. Ватан хуьзвай аскеррин хизанрин комитетдин региондин отделенидикай рахайтIа, ада военкоматрихъ, рес­публикадин министерствойрихъ, ве­домс­войрихъ, муниципалитет­рихъ галаз санал кIвалахзава, СВО-дин иш­тиракчийрив куьмек агакьарзава. СВО кьиле физвай областриз ара-ара мергьяматлувилин куьмек ракъурзава. Рухваяр телеф хьанвай дидейрин дерт кьезиларун патал абурухъ галаз жуьреба-жуьре мярекатар тухузва.

СтIал Сулейманан тIварунихъ галай паркуна, Аваррин госмуздрамтеатрдин вилик сувариз талукьарнавай еке концерт кьиле фена­. Паркуниз атанвай вишералди­ инсанри Дагъустандин халкьарин­ манийрихъ яб акална, милли кьуьлер­завайбурун устадвилел гьейранвална. Абур республикадин се­нят­каррин гуьрчег безекризни килигна.

Халкьарин садвилин йикъаз та­лукьарнавай концерт Урусрин драмтеатрдани тешкилнавай.

Суваррин шад мярекатар Да­гъустандин вири шегьерра ва районра тешкилнавай.

Нариман  Ибрагьимов