Жавабдарвал – сифте чкадал
Дагъустан Республикадин Кьил Федор Щукина ЖКХ-дин хиле коррупциядиз аксивал авуниз ва кадрияр хкягъуниз талукь месэлайрай совещание кьиле тухвана.
Региондин Кьилин гафаралди, ЖКХ-дин фонд хуьнин ва ремонт авунин месэлайри агьалийрик гьамиша секинсузвал кутазва. Абуруз чпи пул гьихьтин къуллугърай ва гьикьван гана кIанзаватIа, ачухдиз чир хьана кIанда. Алай йисан анжах сад лагьай кварталда Госжилинспекцияди административный рекьяй чIурувилериз рехъ гунай 109 протокол кхьена. ЖКХ-дин идара ийизвай организацияр – 4 миллион манатдин ва ресурсрихъ галаз алакъалу идараяр 5 миллион манатдин жерме авуна.
Ф. Щукина малумарна хьи, чIуру крар, гьалар арадай акъуддай серенжемарни кьабулна кIанда. Ада РД-дин эцигунрин, архитектурадин ва ЖКХ-дин министерстводал ва Госжилинспекциядал такьатар харж авунал гуьзчивал кIеви авун, тамамарзавай кIвалахрин гьакъикъивал тайинарун ва агьалийрилай къвезвай арзайрив дикъетдивди эгечIун тапшурмишна.
Республикада коррупциядиз акси кIвалах тухунал машгъул комиссияди кьабулзавай къарарар кьилиз акъудуникай кьилди веревирдер авуна. Региондин Кьили лагьайвал, министерствойрин, ведомствойрин ва муниципалитетрин регьберри коррупциядин чIуру крарин вилик пад кьунин кIвалахдин еридин жигьетдай жавабдарвал чIугун лазим я. Дагъустанда капитальный ремонт авуниз кIватIзавай взносри 70 процент тешкилзава. Идан гьакъиндай Федор Щукиназ РД-дин эцигунрин, архитектурадин ва ЖКХ-дин министрдин везифаяр вахтуналди тамамарзавай Анвар Шамилова малумат гана. Ада хабар гайивал, дараматрин, кIвалерин иесийрал капитальный ремонт авуниз талукь взносрай санлай 3,8 миллиард манатдин буржар ала. Агьалийри вахт-вахтунда взносар гун патал региондин операторди хейлин кIвалах тухузва. 2015-йисалай судриз, санлай къачурла, 3,1 миллиард манатдин буржар вахчун патал 207 агъзур материал ракъурнава. Бурж алайбурувай 959,2 миллион манат вахчунва.
Анвар Шамилова къейд авурвал, 2014-2025-йисара республикадин гзаф квартирайрикай ибарат агъзур кIвале капитальный ремонт кьиле тухвана. Яшайишдин кIвалерин шартIар Дагъустандин 139305 агьалиди хъсанарна.
Совещанидал малум хьайивал, ЖКХ-дин къуллугърай республикадин агьалийривай бине авачиз къачунвай 7,6 миллион манат элкъуьрна вахканва. Идан гьакъиндай Федор Щукиназ Госжилинспекциядин регьбер Арсен Гьажиева хабар гана. Адан гафаралди, 2026-йисуз инспекцияди идара ийизвай ресурсралди таъминарзавай идарайра 1319 ахтармишун кьиле тухвана. ЧIуру гьалар арадай акъудун патал 688 предписание ва 466 протокол кхьена. Эцигай жермейри 16,4 миллион манат тешкилзава.
Коррупциядихъ галаз алакъалу чIурувилериз рехъ гунай гьукумдин органрин 74 къуллугъчи жавабдарвилиз чIугунва. 2026-йисан зур паюнин делилар РД-дин Кьилин къвалав гвай государстводин къуллугърин кадрийрин ва коррупциядиз аксивалдай управленидин начальник Артем Гарковенкоди гъана.
Государстводин ва муниципальный идарайрин кьилер тайинардайла, абурун хсуси делояр ахтармишзава. Кьилин везифа ам я хьи, доходрин гьакъиндай тапан делилар гъидай гьалариз рехъ гана кIандач.
Федор Щукина идарайрин кьилер хкягъун важиблу везифа тирдакай лагьана, гьикI хьи, абуру коллективриз регьбервал гунай, бюджетдин такьатар серф авунай ва государстводин эменнидин патахъай жаваб гузва.
«Тайин къуллугърал кандидатураяр хкядайла, истемишунар вилив хвена, дикъетдивди ахтармишун лазим я. ТIалабзава талукь управлениди и месэладиз кьетIен фикир гун. ГьикI лагьайтIа, республикадин кьиле авайбуру коррупциядиз акси яз тухузвай кIвалах акъвазардач, и месэла гьамиша гуьзчивилик жеда», – малумарна Федор Щукина.
РД-дин Кьили заседанидал хабар гайивал, «Дагъустандин команда» кадрийрин программадин иштиракчи Радик Шамсудинов РД-дин Кьилин госкъуллугърин кадрийрин ва коррупциядиз аксивалдай Управленидин начальникдин заместителвиле тайинарнава. «Дагъустандин команда» программадик квай Сиядат Идрисова – вахтуналди РД-дин Кьилин къвалав гвай гуьзчивалдай управленидин начальниквиле, Ренат Къурбанисмаилов РД-дин Кьилин советниквиле тайинарнава.
Хийир Эмиров