Дагъустанда шуьшедин вичиз тешпигь авачир завод эцигиз башламишнава. “Каспий гласс” компанияди яшайишдинни экономикадин рекьяй йигиндаказ вилик финин (ТОСЭР) “Дагъустандин Огни” мулкунал промышленный къайдада шуьшедин гъалар (стекловолокно) гьазурун патал лазим жезвай шуьшедин харар акъуддай кархана кардик кутазва. Ам неинки Россиядин, гьакIни СНГ-дин мулкунал алай ихьтин тек са завод я. Икьван чIавалди Россиядиз лазим продукт къецепатан уьлквейрай гъизвай.
Карханадин генеральный директор Патахудин Мегьамедова гьисабзавайвал, и кар себеб яз, иллаки Россия къецепатан уьлквейрин басрухдик квай гьалара, заводдин продукция виниз тир игьтияж авайди жеда. Ахтармишун патал кардик кутурдалай кьулухъ карханади гзаф кьадарра аваз суьрсет гьеле июндин эвел кьилера рекье тваз башламишда. Заводда кIвалахдин цIийи 25 чка арадал гъанва.
Къецепатан уьлквейрай гъизвай суьрсет эвездай и кархана кардик кутун патал 215 миллион манат серфна (гьа гьисабдай яз 50 миллион манат — промышленность еримлу авунин региондин Фондунин кьезил шартIаралди ганвай заем). “Дагъустандин Огни” ТОСЭР-дин резидент яз компанияди жуьреба-жуьре кьезилвилер ва куьмек ишлемишзава. Заводди анжах ватандин хаммал ишлемишзава. Алай вахтунда ам Подмосковьедай ва Дальний Востокдин карханайрай къвезва.
Шуьшедин гъалар гьазурдай харарин завод СКФО-дин сергьятра шуьшедин къапаралди таъминарзавай зурба кархана тир “Дагъустан Шуьше Къапар” карханадин майдандал кардик кутунва. 2023-йисан эхирдалди ина производстводин гужлувал 1,5 сеферда артухардай фикир ава. И кар ва производстводин асул линия патал алай аямдин истемишунриз жаваб гузвай цIийи цех эцигда.
Карханада кIвалахдин тахминан 300-400 чка арадал гъун ва шартIар мадни хъсанарун фикирда кьунва. Гележегда, хабар гузвайвал, шуьшедин гъалар ва харар Россиядин оборонадин промышленностда ишлемишда.
«Лезги газет»
