Тамар гьар са уьлкведин, халкьдин девлет я. Инсанрин яшайиш патални тамарихъ еке метлеб ава. Гьавиляй абур хуьн, артухарун, жемятдин хьиз, гьар са касдин буржини я.

Гатун чими вахт. Гьаваяр зегьем хьанва. Ракъи­ни, лугьудайвал, цIу хьиз кузва. Федеральный массовый информациядин ва электронный такьатра гузвай хабаррай малум жезвайвал, чи уьлкведин са шумуд субъектда цIаяр кьуникди тамарин хейлин майданриз еке зиянар хьанва.

Кьасумхуьруьн тамарин майишатдин коллективди цIаяр кьунин вилик пад кьадай серенжемар кьабулун гьи дережада ава? И суалдиз жаваб жагъурунин мураддалди чун майишатдин директор Фарманов Лазир Фармановичахъ галаз гуьруьшмиш хьана. Сифтедай чаз ада тамарин майишатдихъ галаз алакъалу делилар гъана. Малум хьайивал, санлай къачурла, тамарин майишатдихъ 22 034 гектардин майданар ава. Идакай 16 135 гектар тамар я. Абур Кьурагь, Мегьарамдхуьруьн, Хив ва СтIал Сулейманан районрин мулкара ава.

- Алай вахтунда, гатун зегьем йикъара, чи коллективдин вилик акъвазнавай кьилин везифа цIаяр кьуникай хуьн, и жигьетдай герек серенжемар кьабулун я, – давамарзава ихтилат Лазир Фармановича. – И кар патал 34 километрдин мензилда тамун къерехар тирвал цанар цанва, зулар авунва. Тамун участокриз техникадин такьатар фидай 4 километр рехъ тухвана, вилик йисара авай 4 километр рекьера ремонтдин кIвалахар авунва. Чи майишатда кIвалахзавай 17 кас къуллугъчияр графикдин бинедаллаз, тамун участокриз физва, талукь серенжемар кьиле тухузва.

Тамарин майишатдин патав 1-дережадин «Лесопожарный центр» кардик ква. Кьиле Межидов Къадир­ Рамазанович аваз, центрадин работникрини еке кIва­лахар ийизва, тамар цIаяр кьуникай хуьзва.

Чаз лагьайвал, районда цIаяр кьунин хаталувал авай мулкарик гуьне патан Испикрин, Шихидхуьруьн ва Уллу Гъетягърин хуьрерин ва патав гвай чкаяр акатзава. Анра алатай йисуз тамун гапIалда цIай кьур са дуьшуьш хьанай. Виридан къуватралди ам хкадарнай, са артух зарар хьаначир.

Гуьне патан хуьрера яд кIватIдай гьавизар (вирер) кьунва, анра йисан кьиляй-кьилиз яд жезва.

– Тамун чкаяр цIаяр кьуникай хуьнин мураддалди чна райондин ва хуьрерин администрацийрихъ галаз сих алакъада аваз кIвалахзава, – лугьузва Лазир Фарманова. – Чахъ пожарный дружинани ава. Чи къуллугъчияр хуьрерин агьалийрихъ галаз гуьруьшмиш жезва, абуруз чеб тIебиатдал гьикI тухун лазим ятIа чирдай ихтилатар ийизва, гъавурда тунин кIвалах тухузва.
Малум хьайивал, мешебегияр кIвалахдин саки вири вахтунда чпин участокра жезва, герек серенжемар кьабулзава.
Тамарин майишат пешекарралди ва герек техникадалди таъмин я.

Гьа са вахтунда, тамарин майишатдин пешекарри, гъавурда тунин кIвалах тухун яз, хуьрера, тамун учас­токра басма авунвай 1000-далай виниз чарар (листовкаяр) алкIурнава.

Чи мурад халкьдин девлет тир тамарал, тIе­би­ат­дал рикI алай Лазир Фарманович кьиле авай майишатдин коллективдихъ кIвалахда агалкьунар хьун я. ЦIаяр кьур дуьшуьшар санани садрани тахьурай! 

Хазран Кьасумов