Гьар йисан августдин кьвед лагьай гьяд юкъуз Россиядин мулкунал Эцигунардайбурун югъ къейдзава. И сеферда суварин югъ 13-августдал гьалтна. ИкI, пешекар суварин вилик РД-дин эцигунрин, архитектурадин ва ЖКХ-дин министерствода «Дагъустан Республикадин гьуьрметлу эцигунардайди» тIвар ва хурудал алкIурдай лишан, гьакIни РД-дин Минстройдин гьуьрметдин грамотаяр гунин мярекат кьиле фена.
Пишкешар вахкай РД-дин эцигунрин, архитектурадин ва ЖКХ-дин министр Артур Сулейманова къейд авурвал, къенин юкъуз республикада са жерге итижлу проектар кьилиз акъудзава. И кардик эцигунрин хиле кIвалахзавай гьар са касдин еке пай ква.
«Региондин эцигунрин хел къвердавай гзаф машгьурди ва гьуьрметлуди хьунал за шадвалзава. Къуй къе квев вахкудай лайихлу пишкешри жегьил несил гьевесламишрай. Къуй абур уьлкведин виридалайни йигиндаказ виликди физвай ва уьлкве патал важиблуди тир хилез желб хьурай», — лагьана министрди.
Гзаф йисара гьакъисагъвилелди зегьмет чIугунай «Дагъустан Республикадин гьуьрметлу эцигунардайди» тIвар идарадин 9 къуллугъчидиз гана. Мад 13 къуллугъчи министерстводин Гьуьрметдин грамотадиз лайихлу хьана.
Эхиримжи йисара Дагъустанда эцигунрин хел йигиндаказ виликди физвайбурукай сад я. ИкI, 2023-йисан 6 вацран вахтунда республикада 419 агъзур кв.метр яшайишдин кIвалер ишлемишиз вахканва. Им алатай йисан гьа и вахтунин делилдилай 141 процентдин гзаф я. Яшайишдин кIвалерин санлай къачур кьадардикай гзаф мертебайрин кIвалери — 214 агъзур кв.метр ва кьилдин ксарин кIвалери 205 агъзур кв.метр тешкилзава.
2023-йисан эхирдалди республикада, санлай къачурла, 1,13 миллион кв.метр яшайишдин кIвалер ишлемишиз вахкун гуьзлемишзава. Эцигунрин комплекс вилик тухунин управленидин начальник Марат Асланова къейдзавайвал, и рекъемар къвердавай винизбур хьуниз республикадин агьалийри хсуси кIвалер маса къачунихъ ва эцигунихъ ялуни таъсирзава.
Жасмина Саидова
