19-декабрдиз Дагъустандин халкьдин майишатдин госуниверситетда «Дагъустан Республикада суьрсетдин хатасузвал таъминаруниз талукь яз кьабулзавай серенжемрин ва авай гьалдин гьакъиндай» стратегиядин сессия кьиле фена. Ана РД-дин Гьукуматдин Председатель Абдулмуслим Абдулмуслимова иштиракна. Сессиядиз гьукумдин органрин, банкарин къурулушрин, илимдин векилриз, муниципальный тешкилатрин кьилериз ва республикадин хейлин районрин, хуьруьн майишатдин къуллугъчийриз теклифнавай.
Сессиядин иштиракчийри регионда суьрсетдин хатасузвал таъминаруниз талукь яз аграриядин комплекс вилик тухуниз талукь рекьерикай веревирдер авуна. Гьа гьисабдай яз суьрсетдин няметрин къиметрикай, балугъчивилин майишат вилик тухуникай рахана, къушчивал кIвачел ахкьалдаруниз, майвайринни емишрин тумар арадал гъуниз ва маса месэлайриз талукь ихтилатар авуна.
Заседание ачухдайла, А.Абдулмуслимова лагьана хьи, Дагъустандин хуьруьн майишатдин къуллугъчийри суьрсетдин жигьетдай уьлкведин хатасузвал таъминарунин кардик аквадай хьтин пай кутазва.
Къейд ийин, ципицIар, лапагрин як, сар, майваяр, прунз, картуфар, бахчадин няметар, емишар гьасилунайни республика кIвенкIвечийрин жергейра ава.Алай йисуз республикада 150 агъзур тонн дуьгуь, 356 агъзур тонн картуфар, 1,5 миллион тонн майваяр ва бахчайрин няметар, 223 агъзур тонн емишар, 282,7 агъзур тонн ципицIар битмишарна.
АПК-дин кар алай хилерикай РД-дин хуьруьн майишатдин ва недай суьрсетдин министрдин везифаяр тамамарзавай Шарип Шарипова суьгьбетна. Ада лагьайвал, 2023-йисан нетижайрай Дагъустанда хуьруьн майишатдин суьрсетдин бегьерлувал 5 процентдин хкаж хьана. Ада мадни хабар гайивал, республикади майвайралди, картуфралди, емишралди агьалияр саки таъминарзава.
«1990-йисалай 2022-йисалди Дагъустанда як гьасилун пуд сеферда, малдин як – кьве сеферда гзаф хьана. 2025-йисалди республикада какайрин кьадар кьве сеферда артухарда.
Эхиримжи вад йисан муддатда регионда прунздихъ галаз алакъалу цIийи 12 агъзур гектар инженерный къурулушар кардик кутуна, 22 агъзур гектар цIийикIа туькIуьр хъувуна», — къейдна Ш.Шарипова.
Дагъустан Республикада авай суьрсетдин запасрикай ва къиметрикай республикадин промышленностдин ва алишверишдин министр Низам Халилова лагьана.
Ада хабар гайивал, 2023-йисуз Дагъустандин мулкара хуьруьн майишатдин мекераяр, фестивалар тешкилуниз талукь план туькIуьрнай. Адан бинедаллаз республикадин шегьерра ва районра мекерадин 3200 мярекат кьиле тухвана.
Совещанидал рахай РД-дин экономикадин ва мулкар вилик тухунин министр Гьажи Султанова къейд авурвал, Дагъустанда хуьруьн майишатдиз гьукуматдин патай куьмек гунин умудлу кIвалах тешкилнава.
«Макроэкономикадиз талукь вири нетижаяр разивалдайбур я. Хуьруьн майишатдикай рахайтIа, и хилен нетижаяр эхиримжи 5-10 йисаринбурулай хъсанбур я. Ихьтин агалкьунар къазанмишуниз агросектордиз куьмек гунини арадал гъизва. Алай вахтунда республикада хуьруьн майишатдин кIвалахар мадни вилик тухудай са шумуд проект уьмуьрдиз кечирмишзава. Абурукай сад «Емишринни майвайрин кластер вилик тухун» я. И проектдиз хейлин инвестицияр чара ийизва, кIвалахдин алава чкаярни арадал гъизва. Идалай гъейри, дагъларин мулкар вилик тухунин, чилер дигидай целди таъминарунин кIвалахарни гъиле кьунва», — лагьана Гьажи Султанова.
Заседанидал хуьруьн майишатдин суьрсет арадал гъизвай карханайрин, майишатрин регьберарни рахана.
Мярекатдал Абдулмуслим Абдулмуслимова зегьметда тафаватлу хьайи хуьруьн майишатдин са кьадар къуллугъчийрив государстводин шабагьар вахкана. Абурун арада «Полоса» агропромышленный компаниядин къуллугъчиярни авай. И компаниядин механизаторар тир Ариф Бейдулаеваз, Валентин Къурбановаз ва бульдозердин машинист Навруз Гьамзатоваз РД-дин Гьукуматдин гьуьрметдин грамотаяр гана.
Хийир Эмиров
