29-июндиз Сулейман-Стальский районда лезгийрин бажарагълу гьикаятчи, са шумуд ктабдин автор, муаллим Нажмудин Шихнабиеван 70 йисан юбилейдиз талукьарнавай мярекат кьиле фена.
Шадвилерин «Пуд СтIал» тIвар алай маканда кьиле фейи мярекатда Сулейман-Стальский райондин администрациядин кьилин сад лагьай заместитель Лацис Оружева, «Лезги газетдин» кьилин редактор Мегьамед Ибрагьимова, Лезгийрин СтIал Сулейманан тIварунихъ галай госмуздрамтеатрдин кьилин режиссер, Дагъустандин халкьдин артист Мирзебег Мирзебегова, Дагъустандин халкьдин артистка Фаризат Зейналовади, РД-дин культурадин лайихлу работник Руслан Пирвердиева, театрдин са жерге маса векилри, шаирри – Сажидина, Майрудин Бабаханова, Абидин Камилова, Агьмедпаша Агьмедпашаева, жегьил, бажарагълу гьикаятчи, «Эренлардин сес» газетдин къуллугъчи Куругъли Ферзалиева, Сулейман-Стальский райондин информациядин агенстводин руководитель Жабраил Асланова, райондин образованидин управленидин начальник Индира Османовади, «Куьредин хабарар» газетдин кьилин редактор Асият Мирзалиевади, юбилярдин багърийри, адан яратмишунрал рикI алай хейлинбуру иштиракна.
Л.Оружева райондин администрациядин тIварцIихъай Нажмудин Шихнабиеваз 70 йис тамам хьун тебрик авуналди, адав пулдин пишкеш вахкана.
Гьикаятчидин уьмуьрдин ва яратмишунрин рекьикай шаир Абидин Камилова гегьеншдиз суьгьбетна. Адан рахунрай малум хьайивал, Нажмудин Шихнабиеван бажарагъ ам студент тир йисара винел акъатна. И вахтунда адан эсерар райондин ва республикадин изданийра чапзавай. Хейлин гьикаяяйрин, фельетонрин, шииррин, очеркрин, повестрин авторди эхиримжи йисара кхьенвай кесерлу эсерар мукьвара юбилейдихъ галаз алакъалу яз Махачкъалада чапдай акъатнавай «Хкягъай эсерар» тIвар алай ктабда гьатнава.
«Лезги газетдин» кьилин редактор Мегьамед Ибрагьимова багъри газетдин коллективдин патай юбилярдив тебрикдин гафар, саламар, Гьуьрметдин грамота ва пишкешар вахкана.
«Нажмудин Шихнабиев лезги гьикаятдин кукIушрикай сад я. Гьайиф хьи, адан эсерриз лезги литературоведениди гьа къени кутугай къимет ганвач. Адан гъиликай хкатнавай «Уьмуьрдин декьикьаяр» повестди бажарагълу гьикаятчидихъ кьетIен алакьунар авайди къалурзава ва чаз адан тIвар лезги литературада надир эсерар арадал гъанвай Межид Гьажиеван, Расим Гьажидин тIварарихъ галаз санал кьадай мумкинвал гузва. Шаирдин вилерай дуьньядиз килигзавай гьикаятчидин эсеррин чIални фикир желбдайди, образрив ацIанвайди, девлетлуди, итижлуди я. Чаз Нажмудин Шихнабиевахъ яратмишунрин рекье мадни еке агалкьунар хьана кIанзава…», — къейдна вичин рахунра М.Ибрагьимова.
Гуьгъуьнлай мярекатдал рахай гзафбуру Нажмудин Шихнабиевакай, адан эсеррикай хуш келимаяр лагьана ва адахъ яргъи уьмуьр, чандин сагъвал хьун алхишна.
Лезгийрин театрдин актрисайри Н.Шихнабиеван са эсердин бинедаллаз сегьнеламишай гъвечIи пердеди, Фаризат Зейналовади, Руслан Пирвердиева, Сулейман-Стальский райондин Культурадин кIвалин гьевескарри тамамарай манийри гьикаятчидин межлис генани экуьди, гурлуди авуна.
«Лезги газет»
