Дагъустандин халкьдин шаир СтIал Сулейманан тIварунихъ галай Лезгийрин гьукуматдин музыкадинни драмадин театр коммерциядинбур тушир организацийрин гражданвилин сифте кьил кутунрин тереф хуьнин рекьяй Дагъус­тан Республикадин Кьилин грант гун патал конкурсдин гъалибчи хьана.

Проектдин сергьятра аваз, СтIал Сулейманан районда «Аял­рин сегьне» («Детская сцена») аялрин сад лагьай театр­дин студия ачухзава. Ам Агъа СтIал-Къазмайрин юкьван школада кардик жеда.

Студия ачухунин месэла веревирд авунин мураддалди театрдин кьиле авайбур райондин­ школайрин коллективрихъ галаз гуьруьшмиш хьана ва бажарагълу аялар, жаван артист­рихъ галаз кIвалахдай педагогар, гьакIни кIвалах тешкилдай вахтар (график) тайинарна.

Машгъул хьунин кIвалахриз кьилин режиссер Казбек Думаева, театрдин тежрибалу артист­ри, гьакIни теклифнавай пешекарри регьбервал гуда. Чирвилер гунин программадик артиствилин алакьунар, сегьнеда чеб тухуз ва рахаз хьун, дидед чIал, вокал, машгьур артистрин мастер-классар жеда.

Гуьруьшда Лезги театрдин директор Динара Эминовади, Казбек Думаева ва райондин об­разованидин отделдин векилри иштиракна.

Проект яргъал вахтунда уьмуьрдиз кечирмишда. КIвалах­­дин нетижаяр кьун аялри та­маша-хкет ва драмадин этюдар къалурун жеда. Адалай гуьгъуьниз «Аялрин сегьне» студияди гьамиша бинедаллаз кIва­лахда. 

Хазран  Кьасумов