Алай вахтунда Сулейман-Стальский  районда 18-майдиз  Дагъустандин халкьдин ша­ир,  ХХ асирдин Гомер СтIал Сулейманан шииратдин йикъариз  талукьарна кьиле тухудай  мярекатрин гьазурвилер аквазва. Агъа СтIалдал гьуьрметлу ксарин куьмекдалди шаирдин кIвал-музей гуьнгуьна хтуна саки акьалтIарнава. Мукьвара ина шаирдин  цIийи гуьмбетни эцигнава. Машгьур художник, скульптор Шариф Шагьмарданова СтIал Сулейманан гуьмбет лап устадвилелди туь­кIуьр­на. Ам Санкт-Петербургда яшамиш жезвай карчи Зураб Шайдаева, музейдиз вичин патай пишкеш хьуй лагьана, гайи такьатрихъ арадал гъана. Сулейман-Стальский райондин  кьил Нариман Абдулмуталибова ва вири районэгьлийри кьегьал хва Зураб Шайдаеваз сагърай лугьузва.