Жуван халкьдин векилрихъ, абур гьина аватIани, агалкьунар хьайила, рикIиз шад жеда. Гуя гьа агалкьун жуванди хьиз гьиссда, кьабулда. Мукьвара гьа ихьтин руьгь кутадай хабар чав Москвадай агакьна: бинеяр СтIал Сулейманан район­дин НуьцIуьгърин хуьряй тир София Янверовна Гуьлагьмедовади химиядай ЕГЭ 100 балл аваз вахкана. Аферин лезги рушаз, вичихъ мадни еке агалкьунар хьурай!

Софияди 1-классдилай Москва шегьердин «Яузадал алай школа» («Школа­ на Яузе») ГБОУ-да кIелна. Ам кьилел буба алачиз чIехи хьана, Софиядин дах ам гьеле аял тир чIавуз рагьметдиз фена. ГъвечIи классрилай гатIунна, ада вичихъ чирвилер къачунин рекье чIехи къастар авайди къалурна. Мектебда кIелунихъ галаз санал Софияди махсус инженерный­ классдани алава чирвилер къачуз гатIун­на. Ина асул гьисабдай физикадайни информатикадай чирвилер гузвай. Нетижа­да адаз Москвадин политехнический университетдин инженерар гьазурзавай мектебдин проектрин сертификатар, Москвадин А.А. Николаеван тIварцIихъ галай ав­томобильно-дорожный колледждин патай София чертежник-конструктор тирди тестикьарзавай махсус шагьадатнама гана.

Мектеб хъсан къиметар аваз акьал­тIарунай София Гуьлагьмедова «За особые успехи в учебе» медалдизни «Мектебдин гъед» лишандик квай махсус кубокдиз лайихлу хьана.

ЦIи Софияди кIелай мектеб санлай 86 аялди акьалтIарна. Лезги рушалай гъейри, абурукай мад садавайни са предметдайни ЕГЭ 100 балл аваз вахкуз хьанач. Им, гьакъикъатдани, хизанривай, мукьвабурувай, ярар-дустаривай дамахиз жедай, тарифдиз лайихлу агалкьун я. Алава чирвилер физикадайни математикадай къачунатIани, химиядай имтигьан гьахьтин дережада аваз вахкун зарафатдин кар туш. Им адан гьар йикъан зегьметдин, къастунин бегьер, нетижа я.

Хьанвай агалкьуникай ингье Софияди вичи вуч лугьузватIа:

«Ихьтин нетижа за регьятдиз къазанмишнач. Адан далудихъ яргъал ва дурумлу зегьмет гала. Зун садрани тарсар, гъавурда гьат тийиз, гьакI эзбериз алахънач. Химиядин предмет лагьайтIа, зун гьамиша хъсандиз гъавурда акьазвай тарс тир.

ЧIехи классриз акъатайла, зи уьмуьрда цIийи девир алукьна. Ада заз неинки чирвилер, гьакIни низам, четинвилериз таб гудай къаст, вилик макьсад эцигиз кIвалахдай къайда гана. За фадлай жуван вилик химиядай ЕГЭ 100 балл аваз вахкудай макьсад эцигнавай, яваш-яваш зун адаз мукьва жез гатIунна.

Заз жувак умудар кутур зи багърийриз сагърай лугьуз кIанзава. ГьакIни муаллимризни – и четин рекье датIана зи патав хьайи, зак руьгь кутур.

Заз акI я хьи, ЕГЭ неинки чирвилер ахтармишзавай имтигьан, гьакIни са тайин­ дережада лотерея я. Гьавиляй кьилинди жувалай аслу крариз кьетIен фикир гун я: кIвалахун, тарсарив рикI гваз эгечIун, и рекье вири къуватар серф авун. Жуван патай герек вири крар авурла, лазим арада агалкьунни ви пата жеда. Зи дуьшуьшда гьа икI хьана…»

Гила Софиядин уьмуьрда цIийи девир алукьнава, адан вилик цIийи ва гегьенш рекьер ква. Къуй адахъ а рекьера къачузвай гьар камуна агалкьунар хьурай!

Агьмед Магьмудов