СКФО-дин акъажунриз гьазур жезва
И йикъара Махачкъалада М. Жафарован тIварунихъ галай дзюдодай Олимпиададин резервдин спортшколада, 21 йисал къведалди яшар хьанвай спортсменрин арада Дагъустандин кIвенкIвечивал патал дзюдодай акъажунар кьиле фена. Ана 200-далай виниз гадайри ва рушари иштиракна, заланвилин 8 категориядай бягьсер тухвана.
ИкI, 81 килограммдин заланвиляй Кьасумхуьруьн самбодин ва дзюдодин ДЮСШ-да вердишвилер къачузвай ва устадвал хкажзавай Ибрагьим Эседулаева 3-чка кьуна.
Гъалиб хьайи ва приздин чкаяр кьур спортсменризни абурун тренерриз РД-дин физический культурадин ва спортдин министерстводин дипломарни медалар гана.
Пешекаррин арада дзюдодай дуьньядин чемпион Тельман Къурбанован гъилик вердишвилер къачузвай Ибрагьим Эседулаева ноябрдин вацра Грозный шегьерда СКФО-дин кIвенкIвечивал патал кьиле фидай акъажунра иштиракда.
Хазран Кьасумов