Мегьарамдхуьруьн районда алай вахтунда кардик квай агьалийрин кIвалерив тIебии газ пулсуздаказ агакьарна акьалтIарунин (догазификация) программадин сергьятра аваз сад лагьай касдин майишат газдин линийрик кутунва, хабар гузва муниципалитетдин информациядин къуллугъди.
Ярагъ-Къазмайрин агьали, федеральный программадин сергьятра аваз, хсусиятда авай кIвалив кьван газдин турбаяр пулсуздаказ агакьарай сад лагьай кас хьанва.
Мярекатда Мегьарамдхуьруьн райондин администрациядин эцигунрин, архитектурадин ва ЖКХ-дин отделдин кьилин пешекар Нагъмет Нагъметуллаева, Дагъустандин “Газпром газораспределение” карханадин къуллугъчийри иштиракна.
Газовикри кудай вили шей кIвалив агакьдайвал турбаяр галкIурунин эхиримжи кIвалахар чкадал хъувуна. Райондин агьалийрин патай 60-далай артух арзаяр план-графикдик кутунва. РикIел хкин, агьалияр патал пулсуздаказ газламишунин программада иштиракуниз талукь арзаяр райондин газдин сетриз къуллугъзавай идарада ва администрацияда кьабулзава. Арза вугудайла, абонентдив кIвал газдин сетрихъ галкIурун патал лазим тир вири документар хьана кIанда.
Къейд ийин, Дагъустан Республикади, Россиядин Президентдин догазификациядин, яни газдин линияр агакьарнавай хуьрера агьалийрин кIвалерив кьван турбаяр пулсуздаказ тухунин гьакъиндай тапшуругъдин сергьятра аваз, активнидаказ кIвалах кьиле тухун давамарзава.
Россиядин Президент Владимир Путина 2021-йисан апрелдиз Федеральный Собранидиз рекье тур Чарче 2021-2022-йисара хуьрерин къенепатан газопроводрихъ галкIур тавунвай кIвалер сетдик агьалийрин такьатар желб тавуна кутун тапшурмишнай. Ихтилат физвайди 2020-йисалди къенепатан сетар туькIуьрнавай ва абурувай агьалидин чилин участокдал кьван мензил 200 метрдилай гзаф ва ишлемишзавай газдин кьадар са сятда 7 кубометрдилай гзаф тушир хуьрерикай я.
И программадин сергьятра аваз газ пулсуздаказ участокдин патав кьван гъизва, адан жугъундивай кIвалин къенез кьван турбаяр иесидин гьакъидихъ тухузва.
Газдин месэладиз талукь яз къейд ийин хьи, Дагъустанда авария жедай гьалда авай, яни къайдадик квачир газдин турбаяр тамамдаказ цIийикIа туькIуьр хъувуниз 540 миллион манат харжда. Идакай РД-дин энергетикадин ва тарифрин министерстводин пресс-къуллугъди хабар гузва.
“Дагъустандин чIуру гьалда авай газдин сетар тамамдаказ цIийикIа туькIуьр хъувунин макьсаддалди 2023-йисуз “Газпром” компаниядик акатзавай карханайри 540 миллион манат рекье твада. Ихьтин делилар РД-дин Кьил Сергей Меликован регьбервилик кваз кьиле фейи оперативный штабдин заседанидал малумарна”, — хабар гузва министерстводин пресс-къуллугъди.
“Газпром межрегионгаз Махачкъала” компаниядин гендиректор Ленар Мансурован гафаралди, санлай къачурла, республикада цIийи хъувунин игьтияж авай газдин сетри тахминан 58 километр тешкилзава. Проектдиз талукь кIвалахар, хабар гузвайвал, алукьдай йисуз гъиле кьада.
Гьа са вахтунда “Газпром межрегионгаз Махачкъала” ООО-ди рикIел хкизвайвал, ишлемишнавай газдин гьакъи гьар вацран 10 лагьай йикъал кьван гун лазим я. И жигьетдай буржар кIватI хьанвай ксари абур тади гьалда вахкун чарасуз я. Артухан “кьил” алачиз ва учирар галачиз и кар, яргъал мензилда аваз, www.mkala-mrg.ru сайтда авай “Абонентдин хсуси кабинетдин”, я тахьайтIа, смартфонра авай “Зи ГАЗ” приложенидин куьмекдалди кьилиз акъудиз жеда. “Хсуси кабинетда” абонентди виликдай ганвай пуларин гьакъиндай, гьакIни кIватI хьанвай буржуникай делиларни ава. Месэладиз талукь суалар квевай “Газпром межрегионгаз Махачкъала” ООО-дин 8 800 200 98 04 нумрадиз зенг авуна гуз жеда.
Жасмина Саидова
