Малум тирвал, уьлкведа кIвачел залан дишегьлийризни 8 йисалай 17 йисал къведалди яшара авай аялар чIехи жезвай хизанриз гьар вацра махсус пособияр гузва. Амма и пособияр вири хизанриз талукь туш.
Мисал яз, аялриз гузвай пособие къачудай ихтияр хизанда авай гьар са касдиз къвезвай къазанжи яшамиш хьун патал герек пулунин регионда тайинарнавай агъа кIанин кьадардилай тIимил тир хизанриз ава. Идалайни гъейри, и пособие къачун патал диде-бубайри чпиз къвезвай зегьметдин гьакъи (ам авачир дуьшуьшра и кардин себебар) документдалди тестикьарна кIанзава.
Мукьвара РФ-дин Гьукуматди кьабулнавай къарардал асаслу яз, тамам тушир мобилизациядик акатнавай хизанриз винидихъ къейд авур шартIар талукь туш. 1-ноябрдилай абурун хизанриз и пособие, са шартIни фикирда такьуна, чара ийида.
Мисал яз, тамам тушир мобилизациядин сергьятра аваз дяведин рекьяй къуллугъ авуниз эвер ганвайдаз виликдай атай гьакъийрин, къазанжийрин кьадар гьисаба кьазвач. Гьатта эгер виликдай, тайин тир себебар аваз, хизандиз пособие гузвачиртIа, тамам тушир мобилизациядик акатайдалай кьулухъ гьахьтин хизанризни пособие чара ийида. Анжах арзачиди Пенсийрин фондуниз вичин уьмуьрдин юлдаш тамам тушир мобилизациядик акатнавайди тестикьарзавай документ агакьарун лазим я.
«Лезги газет»
