Мармардин шутI  гегьеншдаказ чукIу­нихъ галаз алакъалу яз  малумарнавай карантиндин сергьятра аваз, СтIал Сулейманан райондин вири мулкунал  субботник кьиле фена, хабар гузва муниципалитетдин администрациядин информациядин къуллугъди.

Райондин кьил Саид Темирханован теклифдалди санитариядин кIва­ла­хар,  зиянкар гьашаратар терг авун патал ­ре­кье гегьеншдаказ тешкилай мя­ре­катар­ хуьруьн майишатдин карханай­ра ва яша­йишдин къурулушрин объект­рал, кьилди къачуртIа, жемятди ишле­мишза­вай чкайра, образованидин, куль­­турадин­ ва спортдин идарайра кьиле­ тухвана. Хабар гузвайвал,  зиян­кар гьа­шарат­рихъ­ галаз женг чIугун патал сертификация авунвай дарманар ишлемиш­на. КьетIен фикир паркариз, скверриз, рекьин къерехра авай ва кIвалерин патарив гвай, хуьруьн майишатдин мулкарин сергьятрал алай чкайриз гана. ГьакIни пешекарри бязи чкайрал махсус чартмаяр­ эцигнава. Идарайрин къуллугъчийри под­­валар, чардахар ва яшайишдинбур тушир кIвалер ахтармишна, михьна: инра зиян­кар гьашаратри мекьи вахтунда чпиз далдаяр жагъурзава. Абуру чпик чуьнуьх хьун мумкин тир векьер-пешер, набататрин зирзибил кIватIна, масаниз акъуднава.

Къейдзавайвал, субботникдин вахтунда кьетIен фикир хуьруьн майишатдин хилезни гана, гьикI лагьайтIа, мармардин шутIра уьзуьмлухар ва багълар – хуьруьн майишатдин бегьер еке къурхулувилик кутазва. Пешекарри зиянкаргьашарат ахтармишиз, цанвай шейэриз дарманар ягъиз  ва зегьерламиш хьанвай бегьер терг ийиз чирна.

Лагьана кIанда хьи, СтIал Сулейманан районда мармардин шутI гегьенш майданра чкIанвай дуьшуьшар малум туш. ЯтIани, райондин кьили хуьрерин кьиле авайбурухъ галаз санал кьабулнавай серенжемри зиянкардикай нетижалудаказ хуьдай бинеяр арадал гъун лазим я.

Алатай нумрада чна хабар гайивал, мармардин шутIра хуьруьн майишатдин бегьер патал еке къурхулувал арадал гъизва. Гьа са вахтунда инсандин сагъламвал патал ам хаталу туш. Райондин агьалияр дикъетлу хьун патал тагькимарзава. Гьашарат акурла (адал мармардиз ухшар жуьредин шуьтруь ва экуь рангар какахьай къабух ала), ам адетдин жуьреда тергна виже къведач: запун квай циз вегьин ва идалай кьулухъ жагъанвай чкадикай администрациядиз ва я райондин дежурный диспетчервилин къуллугъдин сад тир нумрадиз зенг авун лазим я.

С.Темирханова къейдзавайвал, ма­лумарнавай карантин мумкин тир чIуру гьалар пайда хьунин вилик пад кьунихъ элкъуьрнавай серенжем я. Мармардин шутIрахъ галаз женг чIу­гуниз талукь яз, хабар гузвайвал, райондин администрацияда, Россель­хоз­надзордин ва маса идарайрин пешекарарни желбна, совещание кьиле тухвана. Анал малумарайвал, чка­дин гьакимри кьабулай серенжемрин нетижа­да муниципалитетда зиянкар гьашарат чукIунихъ галаз алакъалу гьалар тамамдаказ гуьзчивилик кутунва. Ахтармишунин кIвалахар ва вилик пад кьунин серенжемар ина Кьиблепатан Дагъустандин вад районда малумарнавай карантин тамамдаказ алуддалди давамардайвал я.

Саида  Мурадова