12-июндин йифен вахтунда гужлу марф ва хар къуникди Ахцегь райондин бязи участокриз селлер атана. Идакай «Лезги газетдиз» Ахцегь райондин пресс-къуллугъди хабар гузва.

ТIебиатдин патай бейхабардиз арадал атай агьвалатди иллаки Ахцегь, Хкем ва Луткун хуьрериз зиянар гана. Кьилди къачуртIа, бязибурун кIвалериз, идарайрин дараматриз селлер акъатна. Юргъади хуьруьн майишатдин мулкаризни, саларизни зиянар гана. Идалайни гъейри, селлери республикадин метлеб авай шегьре рехъни кIевна, нетижада улакьрин гьерекатар акъвазна.

Селлери зиянар гайи кIвалериз йифен вахтунда МЧС-дин къуллугъчийри куьмекар гана. Селди Луткунрин хуьруьз физвай рехъни кIевна, и хуьруьн мектебдин са шумуд классни ци къачуна. Ахцегь хуьре кардик квай ветеринариядин управленидин дараматдиз, адахъ галай мулкариз, райцентрадин медениятдин музейдин цлариз, къавуз вам аса чкайризни хейлин зиянар хьана.

Къейд ийин, 13-июндиз, рекьерин ва коммунальный къуллугъар желб авуналди, рекьер михьи хъувуна, рекьерин гьерекатар ва электролинияр кардик кухнуна.

Тади гьалда совещание кьиле тухвайдалай кьулухъ, райондин кьил О.Абдулкеримов са жерге жавабдар къуллугъчиярни галаз зиянар хьайи чкайрал фена, хьанвай зиянрин кьадар ахтармишна.

Зиянар хьайибуруз райондин кьилин такьатрин жигьетдай куьмек гун хиве кьуна. Агьвалатдикди зиян хьайи хизанриз куьмек гунин рекьяй махсус комиссиядини активнидаказ кIвалахзава.

«Лезги газет»