Чаз кхьизва

14-февралдиз, экуьнин сятдин 4-даз, за Сургутдин аэропортунин вокзалдик зун яшамиш жезвай Покачи шегьердиз хъфин патал такси­ гуьзлемишзавай. И шегьеррин ара­да 230 километр мензил ава. И арада «Махачкъала-Сургут» самолёт чилел ацукьна. Анай пассажирар экъечIна, вокзалдик чпиз чкаяр жагъуриз къекъвезвай. Лезги­ чIа­лал рахазвай жуванбур акурла­, зун абурув рахана: «Ша инал, я гадаяр, зи патав!». Абур мягьтел хьана амукьнавай. Салам гана. За абурувай куьн гьиниз я лагьана жузурла, абуру чеб Ноябрск шегьердиз кIвалахиз физвайдакай лагьана.

Чир хьайивал, чи гадайрин ери-бинеяр Цмурдилай, ЦIийи Ма­кьарилай ва Хуьрелдилай тир. Суьгьбетдик кваз за абуруз Ноябр­скда чи ватанэгьли, вичин ери-бине Эминхуьряй тир, КПРФ-дин шегьердин отделенидин комитетдин сад лагьай секретарь Ефрат Рамазанов авайдакай хабар гана, куьмек герек хьайитIа, адан патав фин теклифна. Цмурдилай тир са хванахвади вичиз зун са гьина ятIани акурди къейдна. Ам заз килигиз амукьнавай. За соцсетрай акун мумкин тирди лагьана. Захъ галаз гзаф рахазвайди Шамиль, муаллим-тренер тир. Покачида чаз кьведаз чидай са касни авай.

За чи гадайриз Алексей Ларионован «Лезгистан» кьве ктабни багъишна, жуван телефондин нумрани гана. За абуруз чи мад са ватанэгьли, халис ватанперес Надир Къурушви Тарко-Сале шегьерда авайдакай чирвал гана. Жуванбур я эхир, герек атайтIа, чир хьурай. За абуруз Покачидиз жуван кIвализ теклифна. Жувахъ авай кьелни фу гудайдакай ва ксудай чка жедайдакай лагьана. Амма абуру чпиз фидай чка ва кIвалах авайди къейдна. Абуруз Ноябрскдиз,  автобус атана, заз Покачидиз такси.

Гьина аватIани, жуванбур сагъ­рай! Сада-садаз куьмек це! Сагърай, лезгияр!

Жалаудин  Абдуразакьов