РикIера яшамиш жезва
«Куьредин хабарар» газетдин – 95 йис
СтIал Сулейманан райондин жемиятдинни сиясатдин “Куьредин хабарар” газетдин редакциядиз гьахьнамазди, дегьлизда аквадай чкадал «Чи редакторар» чIехи стенд ала. Ана жуьреба-жуьре йисара (1931-йисалай 2016-йисалди) газетдин редакторар яз кIвалахай 14 касдин шикилар ава.
«Чи редакторар» стендда гьар са касдин шикилдин кIанихъай абуру газетдиз регьбервал гайи йисар къалурнава. Алиметов Саид Алиметовичан шикилдин кIаник ихьтин рекъемар (йисар) кхьенва: 1943-1950, 1962-1978.
Малум жезвайвал, Саид Алиметовича саки 25 йисуз райондин газетдин редактор яз кIвалахна. Эгер чна и камаллу касди газетдин типографияда, редакцияда кIвалах авур вири йисар гьисаба кьуртIа, лугьуз жеда хьи, ада вич экуь дуьньядал яшамиш хьайи 81 йисакай 47 йис газетдиз бахшна. ИкI газетдиз вафалу хьайи кас адан тарихда мад авач. Саид Алиметовичан экуь къамат, намуслу зегьмет, инсанвилин ерияр чна къе – газетдин 95 йисан юбилей къейд ийизвай йисуз – рикIел хкизва.
...Чи машгьур шаир Алирза Саидова «Арифдаррин муг СтIалар» шиирда кхьизва: «Баркаван чил - Куьре магьал, Берекатрин кIватI я зурба. Ви гьар велед я са кьакьан, Уьзягъ ийир Ватан – буба». Хайи хуьр, Куьре магьал уьзягъ авур инсанрикай сад хьайи Саид Алиметов 1915-йисуз Агъа СтIалдал дидедиз хьана. ГъвечIизмаз бубадикай магьрум хьайи, хизанда чIехи гада тир адаз зегьметдин дадни фад чир хьана.
Хъсан кьатIунар, зигьин авай жаван, 16 йисан яшда аваз, 1931-йисуз (газет акъатиз башламишай йисуз) Кьасумхуьруьн райондин «Колхоздин пайдах» уртах газетдин типографиядиз – наборщикдин учениквиле кIвалахал атана. Четин и кIвалах ада 6 йисуз тамамарна. Вич хъсан терефрихъай къалурай адаз газетдин редакторди корректорвилин къуллугъ теклифна. Кьве йисалай хци зигьин, кьатIунар, ахлакь авай, чирвилерихъ къаних гададал редакторди газетдин жавабдар секретардин къуллугъ ихтибарна. И везифаярни ада 1943-йисалди намуслудаказ кьилиз акъудна.
Дяведин четин йисар. Чкайрал таблигъатчияр, халкь руьгьламишдай тешкилатчияр, хци яракь тир печатдин изданийрин роль хкаждай, бажарагълу пешекарар герекзавай. Гьа ихьтин ерияр фикирда кьуна, райондин руководстводи 1943-йисуз Саид Алиметович райондин газетдин редакторвиле тайинарна.
«Ватандин ЧIехи дяведин йисара чи аскерри женгера къалурзавай кьегьалвилерикай, чи шегьерарни хуьрер душманрикай азад хъувуникай, далу пата кьиле тухузвай кIвалахрикай, колхозри ва кьилдин ксари фронтдиз гузвай куьмекрикай газетда гегьенш макъалаяр чапзавай. 1943-йисуз райондин агьалийри фронт патал 2 миллионни 500 агъзур манат, 1944-йисуз 1 миллионни 115 агъзур манат пул кIватIна ракъурнай», – рикIел хкидай гуьгъуьнлай Саид Алиметовича.
Гьа йисара савадлу пешекарар советрин ва партиядин органрани герек тир. Махачкъалада партшкола акьалтIарнавай жегьил коммунист Кьасумхуьруьн райисполкомдин председателдин заместителвиле тайинарна. И къуллугъдални ада вич савадлу, тешкилатчивилин кIвалах алакьдай пешекар яз къалурна.
1952-1954-йисара Саид Алиметовича партиядин Дагъустандин обкомдин пропогандадинни агитациядин отделдин инструкторвиле, гуьгъуьнлай Хив райондин исполкомдин председателвиле, районрин уртах Кьасумхуьруьн «Сельхозтехника» объединенидин управляющийвиле намуслудаказ кIвалахна.
1962-йисуз Саид Алиметович «Коммунизмдин гатфар» газетдин редакторвиле эхцигна. И везифаяр ада 1978-йисалди кьиле тухвана. И йисара газет баркаллу рехъ фена. Редакциядин коллектив патал и йисар яратмишунрив ацIанвайбур хьана. Редакциядиз кIвалахал чпихъ журналиствилин рекье алакьунар авай, гележегда чпикай машгьур шаирар, писателар, журналистар, гьукуматдин чIехи тIварариз лайихлу хьайи ксар гъана. Мухбиррин, чкайрилай макъалаяр кхьизвайбурун арада Абдулбари Магьмудов, Сажидин Саидгьасанов, Нажмудин Шихнабиев, Абдурагьман Межидов хьтин къелемдин устадар авай. Абур газетдин кIвалахдал желб авурдини С. Алиметов тир. Гуьгъуьнлай абурукай машгьур шаирар, писателар хьана.
1973-йисалай газетдиз макъалаяр кхьиз хьайи зазни Саид Алиметович хъсандиз таниш тир. Тежрибалу журналистди школьник, хуьруьн мухбир тир заз гайи куьмек, къалурай меслятар, гайи насигьатар гзаф я. Абурал за жуван кIвалахда къени амал ийизва.
С.А. Алиметов редактор тир йисара газетдин типографиядин цIийи, гегьенш дарамат эцигна, анаг герек шейэралди тадаракламишна. Районрин газетрин арада тухузвай соцсоревнованийра «Коммунизмдин гатфар» газетди са шумуд йисуз кIвенкIвечи чкаяр кьун – имни Саид Алиметовичан зегьметдин нетижа тир.
Саид Алиметов, пенсиядиз экъечIайлани, вичин рикI алай журналиствиливай, газетдивай къерех хьанач: редколлегиядин тIалабуналди ада редакцияда корректор яз кIвалахун 1988-йисалди давамарна. И йисара ада редакциядин жегьил работникриз журналистикадин сирер чирна, абуруз кIвалахда еке куьмекар гана.
– Камаллу инсан, хъсан регьбер ва тешкилатчи, дерин чирвилер, ахлакь, низам авай пешекар яз, Саид Алиметовича неинки райондин газетда, гьакI уьмуьрдани жанлу гел туна, - лугьузва «Куьредин хабарар» газетдин кьилин редактор Асият Мирзалиевади. – Заз садрани гьич са касдивайни Саид Алиметовичакай наразивилин келимаяр лагьана ван хьайиди туш. Саид Алиметович фейи адалатдин рехъ къе адан веледри, хтулри ва птулри, жуьреба-жуьре хилерин пешекарар яз, давамарзава.
1969-йисалай СССР-дин журналистрин союздин член Саид Алиметовакай са шумуд йисуз «Чирвал» обществодин райондин организациядин секретарь, КПСС-дин райкомдин бюродин член, партконференцийрин делегат хьана. Адан яргъал йисарин гьакъисагъ зегьмет Дагъустандин Верховный Советдин Президиумдин Гьуьрметдин грамотаяр, Дагъустан АССР-дин культурадин лайихлу работник лагьай тIвар, «Знак Почета» орден, «Кавказ хуьнай», «1941-1945-йисара Ватандин ЧIехи дяведа намуслу зегьметдай», «Зегьметдин ветеран», ЧIехи Гъалибвилин 30, 40, 50 йисарин, В.И. Ленинан 100 йисан юбилейрин медалар, «Печатдин отличник» лишан ва цIудралди грамотаяр гуналди къейдна.
Саид Алиметович 1996-йисан 12-февралдиз рагьметдиз фена. «Инсан алемдиз аквазвай кьван гагьди ваъ, инсанрин рикIел аламай кьван гагьди яшамиш жеда», - лагьанай персеринни таджикрин духтур, философ Авиценнади. С.А. Алиметовни гзаф инсанрин рикIера эбеди я.
Хазран Кьасумов,
РФ-дин журналистрин союздин член