РикIера амукьда
И йикъара СтIал Сулейманан райондин кьил Саид Темирханова кьейидалай кьулухъ гьукуматдин шабагьралди къейднавай Украинада кьиле физвай махсус серенжемдин иштиракчийрин мукьвабурухъ галаз гуьруьш кьиле тухвана. ЦIийи Макьарин хуьряй тир Рамидин Гьамидовазни Магьамдали Мегьамедоваз, Дербент райондин Хазар хуьряй тир Шафи Тагьироваз женгера акьалтIай кьегьалвилер къалурунай «Жуьрэтвиляй» орденар гана.
Къейд ийин хьи, аскерар уьмуьрдин эхиримжи декьикьайралди Ватандин вилик чпин хивевай буржидиз вафалу яз амукьна. Къе абур чи арада амачтIани, Ватан патал чанар къурбанд авур и пуд кьегьалди чпин баркаллу краралди тарихда эбеди яз тIварар туна. Акьалтзавай несилриз абур ватанпересвилин чешне я.
Саид Темирханова вичин рахунра къейд авурвал, абурун экуь къаматар ватанэгьлийрин рикIера амукьда, аскеррин кьегьалвилер лагьайтIа, ватанпересрик руьгь кутадай яржариз элкъведа.
Райондин кьили алава хъувурвал, муниципалитетдин администрацияди Украинада кьиле физвай махсус серенжемдин иштиракчийрин, абурун хизанрин дердияр, месэлаяр гьялуниз кьетIен фикир гузва. «Игитрин хизанар садрани текдиз амукьдач, чун гьамиша чалай алакьдай куьмекар гуз гьазур я», – лагьана С. Темирханова.
Чи мухбир