Жув кьару тир журналиствиле кIва­лахзавай яргъал йисара зун жуьре­ба-жуьре пешейрин иесияр тир гзаф инсанрихъ галаз таниш хьана, абурукай за газетризни журналриз макъалаяр, очеркар кхьена. Гзафбурукай заз хванахваяр, дустар хьана. Вичиз гьахълудаказ «Къуччагърин дере» лугьузвай КIварчагърин дередиз мус фейитIани, зун и хуьряй тир кеменчи, чуьнгуьр, тар ядай устад, манидар, гьа са вахтунда машгьур чатухъанни тир Абдурагьимов Омар Селимовичал кьил чIугун тавуна хкведачир. Адакай за 2008-йисан гатфариз, «Къуччагъ хва Омар» кьил гана, «Лезги газет» ва «Куьредин хабарар» газет­риз вижевай очеркни кхьенай.

Омар Селимович чи арада амачиз са шумуд йис я. Амма яргъал йисара халкьдиз искусстводин рекье къуллугъ авур, 1960-йисуз Москвада кьиле фейи Дагъустандин искусстводинни литературадин декадада иштиракай, вичин мецикайни гъиликай гьич са касни бейкеф тавур О. С. Абдурагьимован тIвар КIварчагъ дередин хуьрерин агьалийри, ам чидай вирибуру рикIера хуьзва.

Ингье Омар Селимовичан 90 йисан юбилейдихъ галаз алакъалу яз, за 18 йис идалай вилик блокнотда авур кхьинар гъилелай ийизва, жуван чIехи стхадай кьур адан экуь къамат рикIел хкизва.­

Омар Абдурагьимов 1936-йисуз КIварчагърин хуьре чатун устIар Селиман хизанда дидедиз хьана. Ада хуьре школа, Батайск шегьерда киномеханикар гьазурдай курсар акьалтIарна.

1954-1958-йисара Омар Селимовича Дагъустандин Огнида ва Кьасумхуьрел культурадин кIвалера художественный руководителвиле кIвалахна. Лагьана кIанда, им дуьшуьшдин кар тушир: гьеле школада кIелзавай йисарилай Омара устадвилелди чуьнгуьр, тар, далдам язавай, манияр лугьузвай. Ам райондин культурадин кIвалин художественный самодеятель­ностдин активный иштиракчи тир.

Алакьунриз, анжах тек са вичиз хас тир бажарагъдиз килигна, 1958-йисуз О. Абдурагьимоваз Лезгийрин СтIал Су­лейманан тIварунихъ галай драмте­атрдиз кIвалахал теклифна. Вичин стха, гьам чуьнгуьр ядай устад, гьам ша­ир, манидар тир Салигьахъ галаз санал Омар Селимовичакай театр­дин­ музыкант хьана. Гьа са вахтунда ада театрдин сегьнеда 10-дав агакьна жанлу къаматарни яратмишна.

Чна винидихъ лагьайвал, Омар Абдурагьимова 1960-йисуз Москвада кьиле фейи Дагъустандин искусстводинни литературадин декадада, 1965-йисуз Вирисоюздин фольклордин конкурсда иштиракна, анра лауреатвилин тIварар къачуна.

Хизандин гьалар себеб яз, Омар Абдурагьимов 1965-йисуз хайи хуьруьз – КIварчагъиз – хтана­, ина ки­но­ме­ханиквиле кIвалахиз башламиш­на. Гьа са вахтунда ада хуьруьн куль­ту­радин кIвалин патав тешкилна­вай ­агитациядинни художественный­ «Норма» бригададин ва халкьдин алатрин «КIварчагъ дере» ансамбл­дин кIва­лах­рани активдаказ иштиракиз хьана. И йисара Омар Селимовича вичин устадвал «Кьасумхуьруьн далдамчияр» ансамблдик квазни къалурна.

Манидар, музыкант, киномеханик - гьинай, чатун устIарвал гьинай? – суал гун мумкин я газет кIелзавайда. РикIел алама, 1992-йисуз зун Омар Селимовича кIвалахзавай чатук фенай. Ина ада гьазурнавай ципицIар атIудай ва яша­йишда ишлемишдай чукIулар, дегьреяр, машаяр, куьтенрин магъар ва маса шейэр акурла, гьа суал устIардиз зани ганай.

Омар Абдурагьимова заз гьа сирни ачухнай. Малум хьайивал, Омаран дах Селимани шиирар кхьидай­, чуьнгуьр, тар ядай, манияр лугьудай. Идалайни гъейри, ада саки­ 50 йисуз КIварчагъа чатун устIар яз кIва­лахнай. Лап жаван яз, Омара дахдиз чатук куьмекар гудай, гуьгъуьнлай гадади и пеше вичизни чирна. Санлай къачурла, О. Абдурагьимова совхозда чатун устIар яз 8 йисуз кIвалахна. И йисара адан тIвар ва шикил совхоздин Гьуьрметдин доскада хьана.

- Заз са шумуд йисуз Омар Абдурагьимов, Жамал Шагьмарданов, Салигь Селимов хьтин устадрихъ галаз санал «КIварчагъ дере» ансабмлдин кIвалахда иштиракун кьисмет хьана, - лугьузва бажарагълу культработник, музыкант ва манидар Зейнулагь Наврузова. – Абуру заз гайи насигьатар ва къалурай меслятар къени зи рикIелай алатзавач.

Гьа са вахтунда Омар Селимович хъсан шаирни тир. Адахъ 200-далай виниз вичи теснифай, газетризни журналриз акъатай шиирар авай. «Лезги газет», «КIела, аялар», «Шаир Сулейман», «Ватан патал чан гайибур», «Намерд кас», «Зи диде», «Складчидин арза», «Зи хайи хуьр – КIварчагъар» ва ма­са шиирар кIварчагъвийрин ри­кIел къени алама. Вичин гзаф шиирриз Омар Абурагьимова музыкани кхьенай, кемен ягъиз, абур ширин сесиналди лугьунни ийидай. Адаз Етим Эминан гзаф шиирарни хуралай чидай, хейлинбур муаллим Даниял Мегьамедова кхьинни хъувунай. Абур ктабрани гьатнава.

Манидар, музыкант яз, яргъал йисара халкьдиз къуллугъ авур О. Абдурагьимовахъ ДАССР-дин Верховный­ Советдин Президиумдин, республикадин культурадин министерстводин, райондин культурадин управленидин гзаф кьадар дипломар, грамотаяр авай.

1995-йисуз пенсиядиз экъечIай­лани, Омар Селимовича искусстводин­ рекьяй халкьдиз къуллугъ авунин кар давамарна. Адан иштираквал авачиз неинки КIварчагърин дередин хуьрера, гьакI райондани культурадинни шадвилин гьич са мярекатни кьиле фидачир…

РикIел таджикринни персерин духтур, философ Авиценнади лагьай келимаяр къвезва: «Инсан алемдиз аквазвай кьван гагьди ваъ, инсанрин рикIел аламай кьван гагьди яшамиш жеда».

И келимаяр Омар Селимовичазни хас я. Амни инсанрин рикIера яшамиш жезва ва жеда.

Хазран  Кьасумов