14-апрелдиз Кьуругь райондин КIирийрин хуьруьн спортдин школа-интернатда (директор Надир Тагьиров) генерал Къагьриманов Муьгьуьдин Гьамидовичан къамат рикIел хкуниз бахшнавай мярекат кьиле фена. Ам Россиядин Гимн ягъуналди ва РФ-динни РД-дин пайдахар хкажуналди башламишна.
Мярекат ачухай Н.Тагьирова вичин докладда генерал М.Къагьриманован уьмуьрдин ва зегьметдин рекьикай куьрелди суьгьбетна.
— М.Къагьриманова 40 йисалай виниз Советрин Армияда къуллугъна. Адакай Къазахстандин ва Туьркменистандин Верховный Советдин депутат ва Туьркменистандин компартиядин Центральный комитетдин член хьана. Ам 10-далай виниз Россиядин, Къазахстандин, Туьркменистандин, Анголадин ва маса уьлквейрин гьукуматдин шабагьрин сагьиб я, — рикIел хкана докладчиди.
Генерал Къагьриманован уьмуьрдин ва женгинин лайихлувилерикай КIирийрин хуьруьн спортдин школа-интернатда тарихдин тарсар гузвай муаллим Саид ТIажибова ихтилатна.
Мярекатдин иштиракчийриз тебрикдин гафар райондин образованидин отделдин начальник Рамазан Катибова, райадминистрациядин кьилин заместитель Махач Хариева, РД-дин образованидинни илимдин министерстводин психологиядинни медико-педагогикадин комиссиядин пешекар Шапери Къурбановади ва масабуру лагьана.
Райондин искусствойрин школада, КIирийрин хуьруьн СОШ-да ва КIирийрин хуьруьн спортивный школа-интернатда кIелзавай аялри дяведин йисарикай манияр лагьана ва халкьдин кьуьлер тамамарна.
Гуьгъуьнлай КIирийрин хуьруьн спортдин школа-интернатда муаллим яз кIвалахай ва вахтсуздаказ рагьметдиз фейи Сувар Къурбановадин тIварунихъ тарихдинни край чирдай музей ачухна.
Кьурагь райондин кьил Замир Азизован патай Махач Хариева музейдиз къиметлу суьрет багъишна.
Мярекатда Кьурагь райондин кьил З.Азизова вичин заместителар ва администрациядин жавабдар къуллугъчияр галаз иштиракна.
Йикъан кьвед лагьай паюна спортдин школа-интернатдин спортзалда Кьурагьрин юкьван 1-нумрадин, КьепIиррин ва КIирийрин школайрин, Кьурагь райондин администрациядин, Россиядин МВД-дин Кьурагь районда авай ОВД-дин ва КIирийрин хуьруьн спортдин школа-интернатдин командайрин арада волейболдай акъажунар кьиле фена.
З.Саидова
