Россиядин Президентдин СКФО-да авай векилдин заместитель Мегьамед Рамазанов ва Россиядин МЧС-дин министрдин заместитель Алексей Кострубицкий Мегьарамдхуьруьн райондиз фенвай. Абурухъ РД-дин Гьукуматдин Председателдин заместитель Нариман Абдулмуталибов, Россиядин МЧС-дин Дагъустанда авай кьилин управленидин начальник Муслим Девришбегов, РД-дин зегьметдин ва яшайишдин рекьяй вилик финин, экологиядин ва тIебиатдин ресурсрин, эцигунрин, архитектурадин ва ЖКХ-дин министрар тир Мегьамедзагьид Кихасуров, Ратмир Расулов, Бахтияр Улаев ва гьакI РД-дин здравоохраненидин министерстводин векиларни галай. Мугьманар райондин администрациядин кьил Нариман Эфендиева кьабулна.
Мугьманри галаз-галаз марфар къуникди Мегьарамдхуьре кIвалер ацахьнавай ва цик акатнавай чкайрал кьил чIугуна. Абуру зиянар хьанвай агьалийрихъ галаз суьгьбетарна, райондин поликлиникадиз килигна ва администрацияда оперативный штабдин заседание кьиле тухвана.
Марфар къуникди Космонавтрин куьчеда кьве кIвал ацахьнава, амайбурал яд акьалтна. Мугьманри кIеве гьатнавай агьалийрин суалриз жавабар гана, гьукуматдин патай куьмек агакьун патал арзаяр кхьидайвал чирна ва маса месэлайрин гъавурда туна. Къейд авурвал, районда гьалар, санлай къачурла, пайгардик ква ва гьукумдин органри чпелай аслу тир вири крар ийизва.
Тамамдиз Мегьарамдхуьруьн райондин администрациядин сайтдай кIелиз жеда.
«Лезги газет»
