10-ноябрдиз – Россиядин Федерация­дин къенепатан органрин къуллугъчи­дин юкъуз – къанун-къайда хуьнин кIва­лахдин везифаяр кьилиз акъуддайла телеф хьайибурун экуь къаматар рикIел хкун яз, Махачкъалада Баркаллувилин мемориалдал цуьквер эцигна, са декьикьада кисна акъвазна.

Мярекатда Дагъустандин Кьил Федор­ Щукина, РД-да къенепатан крарин министр Абдурашид Мегьамедова, Госавтоинспекциядин Управленидин начальник Мегьамед Садикьова, Дагъустандин Хатасузвилин Советдин Секретарь Мегьамед Баачилова, къанун-къайда хуьдай къурулушрин къуллугъчийри ва масабуру иштиракна.

Абдурашид Мегьамедова, пешекарвилин сувар тебрик авунин келимайрихъ галаз сад хьиз, къенин юкъуз республикадин, санлай уьлкведин къанун-къайда хуьзвайбурун къуллугъдихъ авай важиблувал къейдна.

– Чи пешеда виридалайни кьилинди чна къуллугъ кьиле тухузвай мулкара хъсан яшайиш, ислягьвал ва секинвал таъминарунин жигьетдай жавабдарвал я. Чаз инсанриз секинвал гьиссдай, гудай къуллугъ кьилиз акъудун кьисмет хьана. Республикадин кьиле авай ксар чаз кIвалахда датIана куьмекар гунай сагърай! – лагьана ада.

Федор Щукина къанун-къайда хуьдайбуруз сувар тебрикна, региондин къуллугъдин кьетIенвал, четинвилер, тарихдин метлеб къейдна.

– Куь хиве тунвай везифаяр гьукуматдин виридалайни жавабдарбурукай я – агьалийрин хатасузвал таъминарун, абурун итижар ва ихтиярар хуьн. Дагъустан терроризмдихъ, экстремизмдихъ ва тешкиллу­ тахсиркарвилерихъ галаз алакъалу четин имтигьанрай экъечIна. Къуллугъдин рекьяй везифаяр кьилиз акъуддайла телеф хьайибур чна гьамиша рикIера хуьда. За Дагъус­тан Республикадин къенепатан крарин министерстводин вири къуллугъчийриз пеше­карвилин сувар тебрикзава, чанарилайни гъил къачуна, намуслудаказ кьилиз акъуд­завай къуллугъдай сагърай лугьузва, – къейдна республикадин Кьили.

*  *  *

Алатай саласадиз Росгвардиядин Да­гъус­танда авай Управленидин «Скор­пи­он-Каспий» ОМОН-дин базада, кIва­лах­дин рекьяй везифаяр тамамардайла  телеф хьайибур рикIел хкунин лишан яз, отряддин командир абурун дидейрихъ ва хендедайрихъ галаз гуьруьшмиш хьана.

Мярекат телеф хьайи аскерриз ОМОН-дин базадин гьаятда хкажнавай мемориалдал цуьквер эцигунилай са декьикьада кисна акъвазуналди, абурун экуь къаматар рикIел хкунилай башламишна.

Отряддин командир, полициядин полковник Александр Гортыпанова дишегьлийрихъ галаз суьгьбетна, къалабулух кутазвай месэлаяр веревирдна ва алакьдай вири жуьредин куьмекар гуз гьазур тирдахъ инанмишарна, личный составдин тIварунихъай абурув пулдин куьмек агакьарна.  

Регина Семедова