Муаллимрин йикъан вилик Кьасумхуьрел, мергьяматлувилин «Иман» фондуни кьил ва къуьн кутуналди, пешекарвилин сувариз бахшна, кьиле фейи еке мярекатда Кьиблепатан Дагъустандин вад райондин образованидин хиле зегьмет чIугвазвай лайихлу муаллимар кIватI хьанвай. КьетIендаказ къейд авуниз лайихлу кар мадни ам тир хьи, «Иман» фондуни 500-далай виниз муаллимрин яргъал йисарин гьакъи­сагъ зегьмет пулдин ва рикIел аламукьдай пишкешар гуналди къейдна.

Муаллимриз сувар тебрик авун официальный ксарин ва вад муниципалитетдин образова­нидин отделрин къуллугъчийрин  иштираквал аваз кьиле фена. Мярекатдин гьуьрметлу мугьманрин арада Дагъустан Республикадин Халкьдин Собранидин депутатар тир Имам Яралиев ва Арсен Пирмегьамедов авай. СтIал Сулейманан райондин Кьил Саид Темирханова, муаллимрин гьар йикъан зегьмет, камаллувал ва акьалтзавай несил тербияламишунин кардик кутазвай еке пай къейд авуналди, педагогвилин зегьметдин ветеранриз сувар рикIин сидкьидай тебрикна.

– Заз педагогвилин зегьметдин ветеранриз и югъ кьетIендаказ теб­рик ийиз кIанзава. Яргъал йисара куьне куь вири къуватар ва къимет авачир вахт агъзурралди аялриз чирвилер ва лайихлу тербия гун патал серфна. Элдин патахъай чIу­гур­ гьакъисагъ зегьмет­ди хъсан нетижайрални гъанва: куьне тарс гайибур чIехи хьана, об­разование къачуна­, абуру чи уьлкведин абадвал патал зегьмет чIу­гвазва, чи халкьдин ва уьлкведин итижар хуьзва. Абурукай гзафбуру чпин буржи намуслудаказ тамамарзава, дяведин махсус серенжем кьиле тухузвай зонада чпин хиве тунвай везифаяр баркалла алаз кьилиз акъудзава.

Къенин мярекат меценат, «Иман» фонд арадал гъанвай Фиру­за Назимовна Керимо­вади кьил кутуналди­ ва адан финансрин та­кьат­рин куьмекдалди кьилиз акъудзава. «Иман» фондуни культурадин, образованидин, спортдин, жегьилри зегьмет чIугвазвай хилериз, чпихъ тIимил агьвал авай хизанриз ва СВО-дин иштиракчийрин хизанриз куьмекар гузва. Гьар йисуз гзаф кьадар конкурсар ва олимпиадаяр кьиле тухузва, лезги чIалалди ктабар акъудзава. Чи райондин яшайишдин хилек еке пай кутазвай заз Керимоврин ва Ханбалаеврин хизанриз сагърай лугьуз кIанзава.

Чун муаллимрин пешекарвилин суварин вилик ква. Гьуьрметлу муаллимар, играми ветеранар, мад сеферда рикIин сидкьидай тир тебрикдин чими келимаяр кьабула! Квекай гзафбуру мектеб­ра кIвалахун давамарзава. Квехъ чандин мягькем сагъвал, хизанра хушбахтлувал хьана кIанзава, гьакIни, гьелбетда, квелай рази ученикар, пешекарвилин яргъи уьмуьрни, – къейдна Саид Темирханова.

Муаллимриз пешекарвилин су­вар Дагъустандин Халкьдин Соб­­ранидин депутат, меценат Имам Яралиева тебрикна. Ада му­аллимвилин пеше кIвалахдиз бахш авун, сабурлувал ва аялар кIан хьун истемишзавай гьевес, везифа тирди къейдна. Депутатди вичин муаллимар чими келимайралди ва разивилелди рикIел хкана, иллаки насигьатчийрилай республикадин ва уьлкведин гележег аслу тирди, абуру неинки чирвилер гузвайди, гьакIни виликди физ, зегьмет чIугваз, яратмишиз чирзавайди къейдна ва муаллимрихъ мягькем сагъвал, акьалтI тийир къуватар, абурулай разивалдай ученикар хьун алхишна.

Имам Яралиева сенатор Сулейман Керимова республика вилик тухуник чIехи пай кутазвайди, дагъустанвийриз еке куьмекар гузвайди къейдна.  Сулейман Керимов виридалайни зурба карчийрикай, государстводин деятелрикай сад, вичиз виридалайни гзаф гьуьрметзавай  дагъустанвийрикай сад, вири Россиядиз машгьур ва еке къимет гузвай кас яз чизва.

Керимоврин хизанди Россиядин жуьреба-жуьре регионра ва республикада агъзурралди къени крар кьилиз акъуднавайди рикIел хкана. Депутатди Керимоврин ва Ханбалаеврин хизанриз, «Иман» фонд арадал гъанвай Фируза Назимовнадиз кьилди Дагъустандин агьалийрин абадвал, гьакI хайи СтIал Сулейманан район патални чIугвазвай зегьметдай сагърай лагьана.

Мергьяматлувилин «Иман» фондунин тIварунихъай муаллимриз сувар Арсен Пирмегьамедова тебрикна. «Умуд» фондуни педагогвилин зегьметдин ветеранриз, муаллимриз, жемиятда эдеб-ахлакьдин диб, гиг тирбуруз, куьмекар гун вичин буржи яз гьисабзавайди къейд авуналди, пешедиз вафалувиляй сагърай лагьана.

Суварин юкъуз кIватI хьанвай­бурун гуьгьуьлар Кьиблепатан Да­гъустандин яратмишунардай коллективри мадни хкажна, муаллимвилин пешедиз бахшнавай музыкадин композицийри ва шиирри иллаки. Мярекат, дугъриданни, яр­гъалди рикIел аламукьдайдаз, чими гзаф легьзеяр багъишайдаз элкъвена. Чпин кIвалахдиз, уьмуьр­дин рекьиз кьетIен фикир­ гунай муаллимрик шадвал ва руьгь акатайдал шак алач.

Регина  Семедова