Мягькем бине
Россиядин Президент Владимир Путина лагьана: «Чна чи гележег мягькем бинедал эцигна кIанда. Ихьтин бине ватанпересвал я». Ватанпересвал гафуналди ваъ, кардалди субутна кIандайдакай лагьанай чIехи критик В. Белинскийди. Гьакъикъатдани, и гафунин мана зурбади я.
Чи халкьдихъ ватанпересвал вири девирра хьайиди я. Украинада дяведин женгинин махсус серенжем башламишайдалай гуьгъуьниз «ватанпересвал» гаф чна мукьвал-мукьвал ишлемишзава. Ана гзаф кьегьалри чпиз Ватан гзаф кIанзавайди гьар юкъуз субутзава…
Ихьтин веревирдер авунал зун мукьвара Россиядин Игит Радим Халикьован тIварунихъ галай Кьулан СтIалрин юкьван школадиз фейила, ана акьалтзавай несил ватанпересвилин руьгьдаллаз тербияламишун патал тухузвай кIвалах, цларал алай шикилрин стендар, плакатар акурла атана.
Школадин гьаятда Радим Халикьоваз эцигнавай памятник ава. Дараматдин вилик патан цларал СВО-да телеф хьайи са шумуд кьегьалдиз мемориалдин кьулар ачухнава.
Кьвед лагьай мертебада Радим Халикьован музей кардик ква. Стха Насир Халикьова чаз Игитдин уьмуьрдин ва къуллугъдин рекьерикай ихтилатна, чун музейда авай экспонатрихъ галаз танишарна.
– Зи стха Радим 1970-йисан 8-декабрдиз дидедиз хьайиди я, 2003-йисан 15-декабрдиз ам, къуллугъдин везифаяр тамамардайла, Руслан Гелаев кьиле авай международный бандитрин дестедихъ галаз кьиле фейи женгина игитвилелди телеф хьана, – лугьузва Н. Халикьова.
2004-йисан 22-январдиз акъатай Россиядин Федерациядин Президентдин Указдалди ЦIунти районда авай «Макок» погранзаставадин начальник тир Радим Халикьоваз Россиядин Игит лагьай тIвар гана. Кьегьалвилер школадин выпускникри алай вахтунда СВО-да къалурзава. Им школадин муаллимрин коллективди кIелзавайбурун арада тухузвай ватанпересвилин еке кIвалахдин нетижа я.
Музейда Радим Халикьован военный форма, шабагьар, шикилар, спортда агалкьунрай ганвай медалар, кубокар, документар ва маса затIар ава.
– Игитдин музейда авай экспонатри кIелзавайбуруз ийизвай таъсир екеди я, – лугьузва школадин директор Ифриз Бабаевади. – Школьникриз Радим Халикьован уьмуьрдиз ва къуллугъдиз, игитвилиз талукь делилар чизва.
Акьалтзавай несилдиз ватанпересвилин тербия гун вини дережада авайди къалурзавай делил мадни ам я хьи, школа акьалтIарай са шумуд касди СВО-да иштиракзава. Гзафбур гьукуматдин орденризни медалриз лайихлу хьанва.
Дегьлиздин цлал алай «КьуланстIалвияр – СВО-дин иштиракчияр» стендда 27 касдин шикилар ава. Абурун ватанпересвал, буржидиз вафалувал кIелзавайбуруз чешне я.
Школада акъуднавай «Патриоты России», «Дагестанцы - Герои России», «Дагестанцы – Герои России в СВО» стендарни фикир желбдайбур, аялрик ватанпересвилин ва дамахдин гьиссер кутадайбур хьанва. Абуруз кIелзавайбуру еке итиж ийизва.
- Жаванар ватанпересвилин руьгьдаллаз тербияламишунихъ элкъуьрнавай гьар жуьредин мярекатар чна школада мукьвал-мукьвал тухузва. Игитрин, Ватан хуьзвайбурун, ЧIехи Гъалибвилин, терроризмдиз аксивилин йикъар къейдзава. Школада, Радим Халикьов рикIел хуьнин лишан яз, волейболдай турнир тухузва, СВО-дин иштиракчийрихъ галаз гуьруьшар тешкилзава, - суьгьбет давамарзава Ифриз Бабаевади. – Чи школьникри ватанпересвилин темайрай районда ва республикада кьиле тухузвай мярекатрани иштиракзава, анра хъсан нетижаяр къалурзава.
ИкI, гьакъикъатдани, Радим Халикьован тIварунихъ галай Кьулан СтIалрин юкьван школада ватанпересвал краралди къалурзава.
Хазран Кьасумов