Дагъустандин МВД-дин ГИБДД-дин къул­­лугъчийри Къизляр райондин агьа­­лидин машиндин багажникдай «Яру ктабда» авай буькре балугъар­ дуьз­дал­ акъудна. Идакай МВД-дин пресс-къул­лугъди хабар гузва.

Къейдзавайвал, балугърин умуми заланвал 346 килограммдикай ибарат тир. Агьвалат 15-октябрдиз «Астрахань – Ма­хачкъала» федеральный шегьредин 432 километрдин участокда кьиле фена. ДПС-дин махсус ротадин къуллугъчияр Къизлярдин 36 йисан яшда авай агьалиди гьалзавай «Нива» машин акъвазариз алахъна. Амма улакь гьалзавайда полицейскийрин истемишун кваз кьунач, ам абурукай чуьнуьх жез алахъна.

Месэладай кьил акъуддай чIавуз тайи­­нарайвал, патавай физвай «Лада Гранта» машин гвай водителди, «Нива» гвайдан итижар хуьналди, къуллугъчийрин машиндиз рехъ гун тийиз ва гьа са вахтунда рекье гьерекатунин хатасузвал арадал гъиз, ам акъвазаруниз манийвалзавай. Нетижада кьве машинни акъвазарна. Ахтармишай вахтунда «Нивадин» багажникда буькредин жинсинин балу­гъар авай.

Ватандашрин гьерекатрик РФ-дин УК-дин 258.1-статьядин 3-паюна къалурнавай тахсиркарвилер кваз аквазва.

Улакьдин такьатар ишлемишунин хатасузвал къурхулувилик кутунин гьерекатар кьилиз акъудунай РФ-дин УК-дин 267.1-статьяда къалурнавай тахсиркарвилерин лишанрин бинедаллаз материалар кIватIнава.

Чи мухбир