Мехъерик хьайи мусибат
Дагъустандин МВД-дин пресс-къуллугъди хабар гузвайвал, ЦIунти районда 14-августдиз бедбахтвилин дуьшуьшдик 59 йисан яшда авай са дишегьли кьена ва 31 касдиз хасаратвилер хьана.
Хашархота хуьре мехъер кьиле физвай вахтунда 41 йисан яшда авай чкадин агьалидин 2 мертебадин кIвалин бетондин майдан ва гурар уьцIена. Малумарзавайвал, бетондин майдан ва гурар артухан пар акьалтуникди чкIана. А макъамда мугьманрин са пай 2-мертебадиз хкаж хьанвай, муькуьбур гурарин кIаник квай. Хирер-кьацIар хьайибурукай 18 кас азарханада къаткурна.
Гьакъикъатдиз элкъвена
Алатай жуьмядиз хасавюртвидиз адан дустуни телефондай ихьтин гафар ракъурна: “Стха! Вун дуьздаказ зи гъавурда акьукь, зун мажбур я ваз хабар гуниз. Къе заз ахварай вун муькъвел кьенваз акуна. Жув хуьх, стха”.
Дустуниз ахварай акур кар 2 йикъалай гьакъикъатдиз элкъвена.
15-августдин экуьнахъ “Кавказ” федеральный шегьредал 19 йисан яшда авай хасавюртвиди гьалзавай “Yamaha” мотоцикл, арада хвена кIани мензилдал амал тавун себеб яз, 25 йисан яшда авай, Шамил райондай тир жегьилди гьалзавай “ВАЗ-217030” автомобилдихъ галукьна, мотоциклистди гьа чкадал чан гана.
«Лезги газет»
