Муьгъ! Им ата-бубайрилай инихъ инсанар са нихъ ва я квехъ галаз хьайитIани алакъалу ийизвай рекьин лап четин чка — улам кьезиларзавай гуьзел имарат, кьетIен лишан я. Гьавиляй муьгъ эцигун, туькIуьр хъувун гзаф суваб, амма чIурун гьакьван гунагь авай кар яз гьисабзава.
Ахцегьа Самур вацIалай элячIна Хкемрин хуьруьз физвай муьгъ инсанрин къайгъусузвили чIурна. 20 тонндилай артух заланвал авай улакьар элячIун сергьятламишнавай махсус лишан алатIани, эхиримжи вахтунда, адалай гьатта 50-60 тонн заланвал авай пар дашмишзавай “КамАЗар” (а патай накьв, хъвадай “Аран ятар”, шлакоблокар гъизвай) элячIунин нетижада муькъуьн кIарасдин чин лап къекъерай акъатна. Гена хъсан хьана, адан къадимлу даяхри дурум гана. Муькъвелай гьатта яхдиз физни хаталу тирди акур инсанар шикаятра гьатна. Муьгъ ремонт авунин игьтияж авайвиляй (эхиримжи сеферда ам 1998-йисуз къайдадиз хкана), Ахцегь райондин руководстводи РД-дин Гьукуматдин талукь тир идарайриз арза-ферзе авуна. Аллагьдиз шукур хьуй, халкьдин яшайишдин манадин кьетIен объект энгел тавуна ремонтдайвал хьана. “Дагестан автодор” ГКУ-ди “Рустрой-99” ООО пудратчи карханадихъ галаз икьрар кутIунуналди, ремонтдин кIвалахрив эгечIна. Къимет, тахминан, 2 миллион манат я.
— Ремонтдин кIвалахрив чун 19-сентябрдиз эгечIна, — суьгьбетзава ина ремонтдин кIвалахар кьиле тухузвай “Ахтынский ДЭП-4” АО-дин гендиректор Ринадин Азизагъаева. — Эвелимжи нубатда, хуьруьз рехъ агал тавунин мураддалди, чна дагъдин этегдивай тухванвай газопроводдин рехъ трактордалди михьи хъувуна, ам кардик кутуна. Муькъвел авунвай кIвалахрикай рахайтIа, тахтаяр акъудна, дестекарни кваз михьна, муькъуьн кьве кьилени ракьунни бетондин махсус плитаяр туна, яргъивилихъни гьяркьуьвилихъ вегьенвай мягькем чукьванар дегишарна, абурун винелай тахтаяр (вири кIарасар гидроизоляция ийизва) яна, чахчахар цIийи хъувуна ва икI мад.
Лугьун хьи, муьгъ ремонт авунин жавабдар вири кIвалахар Ринадин Азизагъаеван гуьзчивилик кваз вичихъ 45 йисан тежриба авай устIар Руслан Гъазалиеван бригадади гьакъисагъвилелди тамамарзава. Бригадирди чпин кIвалахдин везифайрив намуслувилелди эгечIзавай устIарарни фялеяр тир Паша Къужаеван, Насир Жалилован, Гьемзебег Мирзабегован, Рауф Парпачеван, Икрам Агьмедован, гьакI Ринатан, Нариманан тIварар кьуналди, абуруз газетдай сагърай лугьун тIалабна.
“Жемятдиз ва ГИБДД-дин къуллугъчийриз ийидай анжах са тIалабун ава: муьгъ хуьн, адалай 20-25 тонндилай артух заланвал авай пар чIугвадай машинар гьал тавун, кьадар къалурнавай лишандал амал авун. Муькъвелай 50-60 тонндин заланвал авай машинар гьалун — им къастуналди ийизвай хьтин еке тахсиркарвал я”, — лугьузва Р.Азизагъаева.
Газет вахкузвай юкъуз малум хьайивал, муьгъ ремонтна акьалтIарнава. Алай вахтунда и муькъвелай улакьрин гьерекат къайдадик акат хъувунва.
Дашдемир Шерифалиев
