СтIал Сулейманан райондин аялрин музшколадин директор Къазибег Шукурбегович Къурбановаз:

Руьгьдал гъайи лекьрен лувар,

Барка хьуй ваз къенин сувар­.

Ви гьар са кар, умуд, ялвар

Вилик фирай мад, Къазибег.

 

КIватI хьанва къе ярар-дустар,

РикIе аваз михьи къастар,

Мубаракиз, лугьуз тостар.

Вине кьаз ви чад, Къазибег.

Магьир устад, сегьнедин рагъ,

Ви кларнетдин чан хьурай сагъ.

Чирвилерин Кьурагьрин багъ,

Муаллим я сад Къазибег.

 

Алакьунар аваз халис

ЧIагурзава гьар са межлис.

Хуьруьн булах, къадим Филис –

Ви илгьам я дад, Къазибег.

 

Саидан рехъ кIевиз кьуна,

Кьуьчхуьр хуьре гелер туна.

Кьегьал хва яз, гъизва вуна

Чи руьгьериз гад, Къазибег.

 

За, Айдуна, негьзава таб,

Къалгъанралди ацIурдач къаб.

Ви лезги кIвал, алачир тIаб,

Мадни хьурай шад, Къазибег.

Ваз ви яратмишунрин межлис тебрикзавай ашукь Айдун