Дагъустан Республикадин Хатасузвилин Советдин заседанидал государстводин гьукумдин ва чкадин чпи чеб идара ийидай органри этнокультурадин жемиятдин кIватIалрихъ ва РД-да авай «Россиядин халкьарин Ассамблея» тешкилатдин региондин отделенидихъ галаз алакъалувал  аваз кIвалахунин месэладиз килигна.

Ихьтин жуьреда сада-садахъ галаз алакъаяр хуьнин менфятлувал екеди я. Ада миллетрин арада меслятвал хуьниз, чуьруькрин, къалмакъалрин вилик пад кьуниз, регионда пайгарвилин, ислягьвилин, дуствилин ва хатасузвилин гьалар арадал гъуниз куьмек ­гузва.

Мярекатдал къейд авурвал, этнокультурадин жемиятдин кIва­тIалрин кар алай везифайрик ­Да­гъустандин халкьарин чIалар, куль­тура ва адетар хуьн акатзава.  И важиблу карда абур государстводин тамам амадагар я. «Россиядин халкьарин Ассамблеядин» региондин отделениди гьукумдинни жемиятдин арада дуьзгуьн алакъаяр тайинарзава, гьукумдин органар республикада кьиле физвай гьаларикай хабардарзава.

Заседанидин вахтунда Дагъустан Рес­публикадин Кьил Федор Щукина Ассамблеядин филиалар республикадин шегьеррин ва районрин муниципалитет­ра тешкилуниз талукь теклифдин тереф хвена. Чкадин отделенийрин регьберар  муниципалитетрин тешкилатрин кьилерин жемиятдин куьмекчияр жез хьайитIа, мадни хъсан я.

Федор Щукина «Россиядин халкьарин Ассамблеядин» региондин отделенидин председатель Зикрула Ильясоваз РД-дин Кьилин куьмекчи хьун теклифна.

«Дагъустандин халкьарин садвал – им лозунг ваъ, гьар юкъуз чи инсанри тамамарзавай кIвалах я. Гьукумдин органрин везифа гьар са дагъустанвиди вич чIехи уьлкведин векил тирди гьиссун патал инсанриз кIвалахдай къулай шартIар тешкилун, гьа са вахтунда миллетрин милли кьетIенвални хуьн я», – лагьана региондин Кьили.

Абад  Азадов