Чи республикада гьар йисан 21-октябрдиз Дагъустандин медениятдин ва чIаларин югъ къейдзава. И юкъуз республикадин вири шегьеррани районра сятдин 11-даз Дагъустандин халкьарин 13 чIалал диктантар кхьена. И серенжем чIаларинни медениятрин ирс хуьнин, агьалийрин савадлувал хкажунин ва хайи чIалар машгьурунин макьсаддалди тешкилзава.

Алатай йисара хьиз, цIини диктант кхьидай ашкъи авай, хайи чIал чизвайвилин дережа ахтармишиз кIанзавай гьар садаз и мярекатда иштиракдай мумкинвал хьана.

РикIел хкин хьи, жуьреба-жуьре шегьеррани районра лезги чIалал агъзурралди ватанэгьлийри, «Лезги диктант – 2016» серенжемдин сергьятра аваз, 10 ва 11-октябрдизни диктант кхьенай. И серенжем 10-октябрдиз къейдзавай Лезги чIалан йикъаз талукьарзава. Гьич са гъалатIни квачиз диктант кхьейбуруз тешкилатчийри гьардаз 10 агъзур манатдин кьадарда аваз пулунин пишкешарни гузва. ЦIи кхьей диктантдин къиметар «Лезги газетдин» сайтда 25-октябрдиз чапдайвал я.

К. Ферзалиев