Украинада кьиле физвай махсус серенжемда иштиракзавай чи кьегьал ва­тан­эгьлийрикай, абурун жуьрэтлувиликай­ «Лезги газетдиз» мукьвал-мукьвал ма­къа­­лаяр акъатзава. Гьакъикъатдани, Ватандин вилик чпин хивевай хвавилин буржи намуслувилелди кьилиз акъудзавай къагьриманар чахъ тIимил авач. Абурукай сад бинеяр СтIал Сулейманан райондай тир Заур Жабраилович Къучев я.

Заур 1992-йисуз Туьрк­менис­тан­дин­ Балканабад шегьерда дидедиз хьана.­ СтIал Сулейманан райондин Эминхуьруьн юкьван мектеб­да кIелзавайла, жаванди вичин­ гележегдин пеше хкяна – офицер хьун. И къастуни 9-класс акьал­тIа­рай­ жегьил 2007-йисан зулухъай­ Санкт-Петербургдин кадетрин раке­тайринни артиллериядин корпусдиз­ акъудна. Ина чирвилер къачузвай­ чIавуз военный кIвалах лап ри­кIивай хуш хьанвай Заур Къучев взводдин командирдин­ заместителвиле тайинарна, адаз вице сержантдин тIвар гана. Гьа са вахтунда жегьилди сагъламвал мягькемаруниз, спортдал машгъул хьунизни кьетIен фикир гузвай. Ада вичин гъалибвилералди Санкт-Петербургдин кадетрин­ корпусрин арада тешкилзавай спортдин акъажунра вичи кIелзавай кадетрин корпус виридалайни ви­кIегь тирди субутна. 2009-йисуз ам губернатордин кубокдиз лайихлу хьана ва кадетрин корпусдин виридалайни хъсан спортсмен яз гьисабна.

2010-йисан августдиз Заур РФ-дин МВД-дин Санкт-Петербургда авай военный институтдик экечIна. Инани ада вичихъ гьам военный, гьамни спортдин рекьяй хъсан чирвилерни алакьунар авайди къалурна. Институтдани адал взводдин командирдин заместителдин везифаяр ихтибарна. Ина кIелзавай йисара агалкьунар авай жегьилдикай дзюдодай спортдин мастервиле кандидат хьана.

2015-йисуз хъсан къиметар аваз (с от­личием) военный институт­ акьалтIарай Заур Къучев Россиядин Яракьлу къуват­рин­ кьушунрин 6910-нумрадин частуниз рекье туна – артиллериядинни зенитный ди­визиондин минометрин сад лагьай батарея идара ийизвай взводдин ­командир яз. 2017-йисуз ам 6913-нумрадин час­ту­низ акъуд­на.­ Инани жегьил офицердал ко­ман­дир­дин ве­зи­фаяр ихтибарна. Са кьадар вахт арадай фейила, Заураз вичин уьмуьр­да дяведин халис гьерекат­ра­ иштиракун кьисмет хьана: ам Хасав­юрт райондин Эндирей хуьре­ чка кьунвай бандитрин тешкилат терг авун патал рекье туна. И чIавуз къалурай жуьрэтлувиляй ам республикадин къанун-къайда хуьдай органрин патай грамотадиз лайихлу хьана.

2021-йисан мартдин вацра Заур Къучевал мадни жавабдар къуллугъ ихтибарна: ам кьушунрин 6904-нумрадин частуна минометрин 3-батареядин командирвиле тайинарна. Гуьгъуьнлай ам СВО-диз рекье гьатна ва серенжемдин сифтедилай къенин йикъалди ада ана иштиракзава.

2022-йисан апрелдиз, гаубичный 3-ба­тареядин командир яз, ви­кIегь лезги­ Криворожский терефда Ингулец вацIун патарив душмандихъ галаз женгиник экечI­на. Ада регьбервал гузвай батареяди десантринни штурмдин 11-бригададин подразделенийрихъ галаз санал мидяйриз вацIун къерехрив эгечIдай мумкинвал ганач. И агалкьунихъ гъалибвал къачунин карда еке метлеб авай. Заур Къучеван батареяди женгинин рекьяй эцигай 60-далай виниз тапшуругъар агалкьунралди кьилиз акъудна.

Ватандин итижар хуьнин карда акьал­тIай викIегьвилер къалурунай Заур Къучев 2023-йисуз РФ-дин Президент Владимир Путинан Указдалди Жукован медалдиз лайихлу хьана. Са кьадар вахт арадай фейила, дирибаш хциз РФ-дин милли гвардиядин кьушунрин Кеферпатан Кавказдин округдин командующийдин приказдалди майорвилин чин гана.

Заур Къучев, ара-ара рухсат гайила, хизандал, мукьва-кьилийрал кьил чIугваз хквезва. Майордин хизанда кьве бицIек чIехи жезва – Марьямни Сулейман.

Къуй дяведин гьерекатар фад акьалтI­рай ва СВО-да авай аскерар сагъ-саламатдиз чпин хизанрив ахгакьрай!

Агьмед Магьмудов