Майифат халадиз Май атун иллаки хуш я. Мегер им хуш тежер сувар яни! И сувар адаз мадни гзаф авиляй кIанзава хьи, Майдин сувари адаз къизилгуьлдин цуьквериз ухшар авай тIавус рушар ганва. Чебни вири майдин ракъар хьиз рикIиз чимибур я.
Килиг садра Майсаратаз. Ада майвачи яз кIвалахзава. Вичелай алакь тийир кIвалах авач. Майдин суварин вилик ада вичив гвай вири майданра гатфарин кIвалахар куьтягьна, мешребда тунва.
Майя малдар я. Суварин вилик ада инсанриз таза мая гайи ниси гьазурна. Гатфарин сифте ниси. Майдин суфра ада ажеб гуьзеларда!
Шумайсат шумал я. Ада шуьшедин чIунардай заводда кIвалахзава. Сувариз ам шегьердин майдандал фида.
Майрам мукьвара музучилищедай хтанва. Ада Майкопда кIелзавай.
Шамайни Хумай кьветхверар я. Кьведни мектебда ава. Пагь, Майдин сувариз абуру акунвай гьазурвилер! Самурдин тамай абуру лап хамувал кумай цириярни пурнияр гъанва.
Самаядиз вахарилай гуьгъуьна акъвазиз кIандач. Са бубат четин крар вахари авуртIани, кIвалин амай крар агудиз ам викIегь я.
ИкI, Майифат халади саки гьар Майдин сувариз вичин ирид руш — ирид Май санал кIватIзава.Ирид руш — ирид къизилгуьл! Абур санал кIватI хьайила, куьнуьди кул авурди хьиз жеда.
Майифат хала гьинай я лугьузвани? Ам чи лезги, дагълух хуьряй я. Адакай заз жуван дидедин ухшарни къвезва. Белки, квезни куь дидейрин, вахарин, сусарин, рушарин ухшарни къвен. Майдин сувар чи вирибурунди тушни!..
Мерд али
